Улаанбаатар /МОНЦАМЭ/. Сэтгүүлч Т.Энхтогтох.

Монгол Улсын Ерөнхийлөгчийн зарлигаар энэ жил Сонгинохайрхан дүүргээс нийт 1 071 ээжид, үүнээс “Эхийн алдар” нэгдүгээр зэргийн одонг 64, “Эхийн алдар” хоёрдугаар зэргийн одонг 1 007 ээжид тус тус хүртээв.

Эдгээр эхийн дотор УИХ-ын гишүүн П.Анужин, “Эхийн алдар” хоёрдугаар зэргийн одонг энэ жил зэрэг гардан авсан эгч дүүс, 30 дугаар хорооны иргэд П.Дунжидмаа, П.Дунчимэг, П.Дунцэцэг нар, мөн нэгдүгээр зэргийн одонгоо авч буй 34 дүгээр хорооны иргэн, 71 настай Ш.Нэргүй нар байна.

Монгол Улсын Ерөнхийлөгч Х.Баттулга хэлэхдээ, “Үндэстэн, улс гүрэн бүр ирээдүй хойчоо өсгөх, төлөвшүүлэн бойжуулахад онцгой анхаарал тавьж, төрийн бодлогыг хэрэгжүүлдэг. Эртнээс цөөн хүн амтай явж ирсэн, Монгол Улс социализмын үед хүн амаа өсгөх бодлогыг хэрэгжүүлж, энэхүү одонг бий болгосон. Энэ бол сайн жишиг, уламжлал учраас Монголын төр үргэлжлүүлэн авч яваа юм. Ээж бүхэн хүүхдүүддээ хамгийн дотно, барагдашгүй хайр энэрлийн эх ундарга, гэрэл гэгээ нь болдог. Тиймээс Монголын төр сайхан эхчүүддээ жилд нэг удаа Монгол Улсын Ерөнхийлөгчийн зарлигаар “Эхийн алдар”одонг хүртээж, хүндэтгэл илэрхийлдэг юм. Энэ жил дэлхий дахинд тархсан “COVID-19” халдварт цар тахлын улмаас “Хүүхдийн баяр”-аар энэхүү одонг гардуулдаг эрхэм уламжлалыг хойшлуулсан ч хэдхэн хоногийн өмнөөс орон нутаг, дүүргээр энэ ажлыг зохион байгуулж гардуулж байна” хэмээв.

Эгч, дүү гурав буюу П.Дунжидмаа, П.Дунчимэг, П.Дунцэцэг нар, “Бид гурав, гурвуулаа “Эхийн алдар” хоёрдугаар зэргийн одонгоо Монгол Улсынхаа ерөнхийлөгчөөс гардсандаа маш их баяртай байна. Үр хүүхдүүдээ, эрүүл саруул өсгөж хүмүүжүүлэхэд ихээхэн анхаардаг” хэмээн сэтгэгдлээ хуваалцав.

“Эхийн алдар” 2-р одон авсан, УИХ-ын гишүүн П.Анужин ярихдаа, “Эхийн алдар” гэх энэ одонгийн мөн чанар бол зөвхөн хүүхдийн тоо биш юм. Төрүүлж өсгөсөн үрээ, хүний дайтай хүн болгож байгаа, өөрөө төрүүлээгүй ч гэсэн хүний үрийг нялх балчирт нь аваад, өсгөн өндийлгөж буй тэр сайхан хүнлэг сэтгэл, хүмүүнлэг их үйлсэд олгодог одон гэдгийг тодотгон хэлэхийг хүсэж байна. Монгол Улсад өнөөдөр нийгэм, эдийн засгийн байдал амаргүй, хүнд, тэр дундаа эмэгтэйчүүдийн хөдөлмөр эрхлэлт, орлого тийм ч сайн биш байна. Гэвч монголчуудын хэлдэг “Хүн нэмэгдэхээр, хүнс нэмэгддэг” гэсэн уужуу ухааныг барьж, энэ олон сайхан үрсийг төрүүлж байгаа эхчүүдээ төр нь шагнаж байгаа нь зүй ёсны хэрэг” гэж онцлон хэлсэн юм. “Эхийн алдар” нэгдүгээр одон хүртсэн иргэн Ш.Нэргүй, “Би зургаан хүүхэд төрүүлсэн. Хүүхдүүдээ зөв боловсон өсгөж, хүмүүжүүлэхэд анхаардаг. Тиймээс хүүхдүүд маань өв тэгш, мэргэжил боловсролтой сайхан амьдарч байна. Хөдөө амьдардаг хүүхдийн маань бичиг баримт хугацаандаа бүрдэж ирэхгүй байсаар, 10-аад жилийн дараа одонгоо авч байна. Төрийнхөө тэргүүнээс одонгоо гардаж авсан бүх эхчүүддээ баяр хүргэе. Монголын үрс маш олон болох болтугай” гэв.

Сонгинохайрхан дүүргийн 1071 эх “Эхийн алдар” одон хүртэв

Сонгинохайрхан дүүргийн 1071 эх “Эхийн алдар” одон хүртэв