Улсын Их Хурлын ээлжит бус чуулганы өнөөдрийн (2020.08.28) хуралдаанаар “Сонгуулийн ерөнхий хорооны гишүүнээр томилох, гишүүнээс чөлөөлөх тухай” Улсын Их Хурлын тогтоолын төслийг хэлэлцэж баталлаа.

Монгол Улсын Ерөнхийлөгчөөс Сонгуулийн ерөнхий хорооны гишүүнээр томилуулахаар нэр дэвшүүлж буйг Монгол Улсын Ерөнхийлөгчийн Тамгын газрын дарга Ө.Шижир танилцууллаа.

Сонгуулийн ерөнхий хорооны гишүүнээр томилох, гишүүнээс чөлөөлөх тухай тогтоолын төслийг УИХ-ын гишүүн Л.Энх-Амгалан танилцуулав.

ТББХ-ны санал дүгнэлтийг УИХ-ын гишүүн Н.Энхболд танилцууллаа.

Сонгуулийн төв байгууллагын тухай хуулийн 4 дүгээр зүйлийн 4.2-т Хорооны гишүүний тавыг Улсын Их Хурлын Төрийн байгуулалтын байнгын хороо, хоёрыг Монгол Улсын Ерөнхийлөгч төрийн жинхэнэ албан хаагчдаас санал болгосноор Улсын Их Хурал зургаан жилийн хугацаагаар томилно гэсэн заалтын дагуу Жамсранжавын Болд, Пүрвээгийн Дэлгэрнаран, Эрдэнийн Түвшинжаргал нарыг Улсын Их Хурлын Төрийн байгуулалтын байнгын хорооноос Сонгуулийн ерөнхий хорооны гишүүнээр томилуулахаар нэр дэвшүүлжээ.

ТББХ Жамсранжав овогтой Болдыг Сонгуулийн ерөнхий хорооны гишүүнээр дэмжье гэсэн саналын томъёоллоор санал хураалт явуулахад гишүүдийн 86.7 хувийн саналаар, Пүрвээ овогтой Дэлгэрнаранг Сонгуулийн ерөнхий хорооны гишүүнээр дэмжье гэсэн саналын томъёоллоор санал хураалт явуулахад гишүүдийн 80.0 хувийн саналаар, Эрдэнэ овогтой Түвшинжаргалыг Сонгуулийн ерөнхий хорооны гишүүнээр дэмжье гэсэн саналын томъёоллоор санал хураалт явуулахад гишүүдийн 86.7 хувийн саналаар, Давааням овогтой Даваа-Очирыг дэмжье гэсэн саналын томъёоллоор санал хураалт явуулахад гишүүдийн 86.7 хувийн саналаар тус тус дэмжсэн байна.

Тогтоолын төсөлтэй холбогдуулан УИх-ын гишүүн Т.Доржханд, Н.Алтанхуяг нар асуулт асууж саналаа хэллээ. Ингээд байнгын хорооноос дэмжсэнЖамсранжавын Болд, Пүрвээгийн Дэлгэрнаран, Эрдэнийн Түвшинжаргал нарыг гишүүдийн олонхи дэмжиж сонгуулийн ерөнхий хорооний гишүүнээр томиллоо.

Сонгуулийн ерөнхий хорооны гишүүдийг томиллоо