Өнөөдөр Дэлхийн банкны суурин төлөөлөгч Андрей Михнев, Монгол Улсын Сангийн сайд Ч.Хүрэлбаатар нар хоёр Санхүүжилтийн гэрээнд гарын үсэг зурлаа. 

Энэ нь дэлхий нийтийг хамарсан цар тахлын үеийн нийгэм, эдийн засагт үзүүлж буй сөрөг нөлөөг бууруулж, хөдөлмөр эрхлэлтийг нэмэгдүүлэх 20 сая ам.доллар, халдварын эрсдэлийг арилгах зорилготой 1 сая ам.долларын 2 санхүүжилтийн гэрээ юм.

20.0 сая ам.долларын нэн хөнгөлөлттэй зээлээр хөдөлмөр эрхлэгчдийн санхүүгийн ачааллыг хугасалж нийгмийн даатгалын шимтгэлээс чөлөөлөх боломжийг бүрдүүлнэ. Ингэхдээ 3 жилийн хугацаанд,

1. Бичил бизнес эрхлэгчдийг дэмжих
2. Цар тахлын үед үйл ажиллагаагаа тасралтгүй явуулж байгаа буюу ажлын байраа хадгалж байгаа ААН-үүдийн НД-ийн шимтгэлийг чөлөөлөх
3. Хөдөлмөр эрхлэлтийн байгууллагын үйл ажиллагааг дэмжих чиглэлээр зарцуулагдах юм байна. 

Харин цар тахлын онцгой байдлын санхүүжилтийн хөтөлбөрийн хүрээнд олгож буй 1.0 сая ам.долларын буцалтгүй тусламжаар коронавирустэй нүүр тулан ажиллаж буй эмч, эмнэлгийн ажилтнуудаа хамгаалж, халдвараас сэргийлэх хувцас, хэрэгсэлд зарцуулахаар тусгажээ.