Монгол Улсын Шадар сайдын 2020 оны 09 дугаар сарын 03-ны өдрийн 99 дүгээр тушаалаар батлагдсан ажлын хэсэг Хилийн боомтын бэлэн байдал, Улс хоорондын ачаа тээврийн аюулгүй байдал, халдвар хамгааллын дэглэмийн мөрдөлт, иргэдийн татан авалт, гадаадын ажиллах хүчний зөвшөөрөлд хяналт, үнэлгээ хийх батлагдсан удирдамжийн хүрээнд Монгол Улсын Шадар сайдын ажлын алба, Эрүүл мэндийн яам, Зам, тээврийн хөгжлийн яам, Уул уурхай, хүнд үйлдвэрийн яам, Онцгой байдлын ерөнхий газар, Цагдаагийн ерөнхий газар, Хил хамгаалах ерөнхий газар, Тагнуулын ерөнхий газар, Мэргэжлийн хяналтын ерөнхий газрын төлөөлөл оролцсон дэд ажлын хэсэг Дорноговь аймгийн Замын-Үүд суманд ажиллаа.

Энэхүү ажлын хэсгийг Эрүүл мэндийн дэд сайд Ш.Анхмаа ахалсан бөгөөд  2020 оны 09 дүгээр сарын 22-ны өдрөөс 23-ны өдрүүдэд Замын-Үүд сумын Онцгой комисс, ерөнхий боловсролын сургууль, цэцэрлэг, эмнэлэг, хилийн боомтод очиж ажиллав.

Замын-Үүд сумын Онцгой комиссын үйл ажиллагаа, Монгол улсын шадар сайд, Сангийн сайд, Хөдөлмөр нийгмийн хамгааллын сайд, Боловсрол шинжлэх ухааны сайд, Эрүүл мэндийн сайдын хамтарсан 2020 оны 08 дугаар сарын 05-ны өдрийн 78/149/А/164/А/14/А/391 “Хичээл сургалтын үйл ажиллагааг эхлүүлэх зарим арга хэмжээний тухай” тушаалын хэрэгжилттэй танилцах зорилгоор ерөнхий боловсролын сургууль, цэцэрлэгт, Коронавируст халдварын хариу арга хэмжээний бэлэн байдалтай танилцах зорилгоор сумын эмнэлэг, хилийн боомтод ажиллалаа.

Мөн Коронавируст халдвар (Ковид-19)-ын цар тахлаас урьдчилан сэргийлэх, бэлэн байдал, хариу арга хэмжээг авч хэрэгжүүлэхэд гарч буй хүндрэл, бэрхшээлийг судалж, шийдвэрлэхээр тусгаарлан ажиглах байрны удирдлагууд, Замын-Үүд дэх БНХАУ-ын консулын төлөөлөгчид, Шуурхай штабынхан болон Олон Улсын ачаа тээвэр, хилийн боомт, иргэдийн нэвтрэх үйл ажиллагаа хариуцсан албаны хүмүүстэй биечлэн уулзаж, санал солилцов.  

Уулзалтын үеэр зарим асуудлыг газар дээр нь шийдвэрлэж байсан юм. Тухайлбал: Нүүрс тээвэрлэлтийг БНХАУ-ын талаас 15:30 минутад зогсоодог талаар аж ахуйн нэгж, байгууллага, тээврийн жолооч нараас санал, гомдол ирсний дагуу БНХАУ-ын Консулын төлөөлөгч болон Замын-Үүд дэх Гаалийн газрын удирдлагуудтай уулзах үеэрээ уламжилж, 17:30 минут хүртэл хүлээн авах нэгдсэн шийдвэрт хүрсэн юм.

Түүнчлэн ажлын хэсэг нь холбогдох төрийн байгууллагууд болон аж ахуй нэгжүүд, хилийн боомт дээр очиж ажилласны дараа Дорноговь аймгийн Замын-Үүд сумын Онцгой комисстой уулзаж, тулгамдаж буй хүндрэл бэрхшээлийг хэрхэн шийдвэрлэх талаар хэлэлцүүлэг зохион байгуулав. 

Энэ үеэр Эрүүл мэндийн дэд сайд Ш.Анхмаа хэлэхдээ: Коронавируст халдвар (Ковид-19)-ын цар тахлын нөхцөл байдал хүндэрч, хүн амын дунд халдвар тархсан тохиолдолд яаралтай хариу арга хэмжээ авах сургагч багш нарыг баг болгон бэлтгэж, тэдгээр сургагч багш нар нь онцгой байдал, цагдаа, хилийн шалган нэвтрүүлэх, мэргэжлийн хяналт, гааль, төмөр зам, гадаадын иргэн харьяат зэрэг мэргэжлийн байгууллагуудын албан хаагчдыг мэдлэг олгох сургалтад хамруулж байгаа нь сайшаалтай. Мөн 24 цагийн тусгай дугаарын утас ажиллуулан, иргэд олон нийтэд цаг алдалгүй мэдээ, мэдээллийг хүргэж байгаа нь тун зөв шийдэл юм.

Гэхдээ хэд хэдэн чухал асуудлууд орхигдсон байна. Энэ талаар манай ажлын хэсэг холбогдох байгууллагуудад дараах санал, шийдлүүдийг уламжлахаар боллоо.

Үүнд: Ачаа тээврийн 350 жолооч нарыг халдвар, хамгааллын дэглэм сахиулах боломжтой тусгаарлан ажиглах, түр амраах байрны асуудлыг яаралтай шийдвэрлэх, хилийн боомтуудад хүйтний улиралд ариутгал, халдваргүйжүүлэлт хийх шинэ арга технологи судалж, орчин нөхцөлийг бүрдүүлсэн байрны асуудлыг шийдвэрлүүлэх, мөн хоригдол шилжүүлэх, хил зөрчигчийг хэрхэн тусгаарлах, хариу арга хэмжээ авах талаар холбогдох түр журам, заавар байхгүй тул ажлын хэсэг байгуулан, түр журам боловсруулж, батлуулан, хэрэгжүүлэх.

Уул уурхайн бүтээгдэхүүний экспортын тээвэрлэлтийн үйл ажиллагааг онцгой нөхцөл байдалд зохион байгуулах түр журам. Хилийн авто замын боомтоор улс хоорондын ачаа тээвэрлэлтийг зохион байгуулах түр журам.

Онцгой нөхцөлд улс хооронд дамжуулан өнгөрүүлэх тир карней бүхий бараа, тээврийн хэрэгсэлд хяналт тавих түр журамд яаралтай нэмэлт, өөрчлөлт оруулах, түүнчлэн хилийн боомтод ажиллаж буй мэргэжлийн байгууллагуудын албан хаагчдыг томуугийн дархлаажуулалтад нэн түрүүнд хамруулах, дархлааг нь дэмжих, албан хаагчдын эрүүл мэндийг хамгаалах ажлыг яаралтай зохион байгуулах шаардлагатай байна гэв.