Оюунчимэг.М 2020.10.02

М.Оюунчимэг: Машинуудыг тэгш, сондгой тоогоор явуулах нь шийдэл биш

УИХ-ын өнөөдрийн \2020.10.02\ үдээс хойших чуулганы хуралдаанаар өвөлжилтийн бэлтгэл ажлын талаарх Монгол Улсын Шадар сайдын мэдээллийг сонсож байна. 

Энэ үеэр УИХ-ын гишүүн М.Оюунчимэг асуулт асуулаа.

Би Улсын онцгой комисс, Нийслэлийн удирдлагуудаас гурван асуулт асууя.

  1. Улаанбаатар хотын утаа өнгөрсөн жил 50 хувь буурсан. Энэ нь үнэхээр чухал ач холбогдолтой байсан. 80 хувь бууруулах бүрдсэн хэвээрээ байгаа юу? Үүн дээр түгээлтэд  асуудал байсан. 4,5 шуудай түлш өгөхгүй байгаагаас болж энэ асуудалыг үүсгэж байсан. Дээрээс нь утаа шүүгч дээр асуудал үүсээд байна. Эдгээр асуудлуудыг шийдвэрлэсэн үү?
  2. Түгжрэлийн асуудал байна. Нийтийн тээврийг үнэгүй биш харин үнэ цэнэтэй тохилог аюулгүй, парк шинэчлэлийг хийе гэсэн асуудлыг өнгөрсөн бүлгийн хурал дээр ярьсан. Тиймээс өнөөдрийн Засгийн газрын сонсох цаг дээр түгжрэлтэй холбоотой асуудлыг хөндөж байна. Түгжрэлийг тэгш, сондгой тоогоор явуулах нь эхний хялбар гарц байх. Гэхдээ энэ бол шийдэл биш. Тэгэхээр шийдлийг яаж харж байна вэ? Нийтийн тээвэр Япон хөрөнгө оруулалтаар хэдэн автобус оруулж ирснээс хойш парк шинэчлэгдээгүй, 80 орчим хувь нь тохьгүй байна.  Үүн дээр нийслэлийн төсөв хэлэлцэх үед түгжрэлийг шийдэх гарцыг олсон уу?
  3. Чингэлтэй дүүргийн 7-р хороо нь Монгол улсын хэмжээнд жишиг болсон 200 айл өрхийг хамарсан, 5 инженерийн шугамыг холбосон сервис центрийг бий болгосон. Мөн бид улсын төсвийн хөрөнгө оруулалт, гадаадын зээл тусламжаар бодит ажил хийж анх удаа харуулсан. Харин өнөөдөр айлуудын амьжиргаат түвшин, гудамж талбай үнэхээр өөр болсон байгаа. Энэ нь жишиг болж нийслэл, аймгийн төвүүдэд дэд бүтцийн төвүүдийг бий болгох чиглэл тавигдсан. Цаашлаад үүнийг хариуцаад аваад явах болохоор Нийслэл өөрөө анхнаасаа эхлэн хариуцсан. Тэгэхээр цааш хариуцаад явах ёстой. Гэтэл тэдгээр айлуудын халуун, хүйтэн ус нь ирэхгүй доголдол гараад байна. Яагаад гэвэл нөгөө компани нь ажлаа өгсөн. Одоо би үүнийг хариуцахгүй гээд хаяад явахад бараг бэлэн байна.  Нийслэл энэ асуудлыг өөрөө хариуцлагатайгаар авч явах ёстой. Өнгөрсөн жил компанитай нь байнга холбогдож, Нийслэлийн удирдах хүмүүс  болон гэр хорооллын дахин төлөвлөлтийн хүмүүсийг дуудаж авчиран хариуцлага тооцохыг нь тооцож байж өвлийг давсан. Харин одоо ингэж өвлийг дахин давмааргүй байна. Нийслэл хариуцсан зүйлээ хариуцсан шиг хариуцах хэрэгтэй байна. Ж.Батбаясгалан, Л.Гантөмөр дарга хоёрт сүүлийн үед эдгээр асуудлыг дэвшүүлж ажил овоо урагштай явж байна. Одончойжил гуай очоод овоо юмнууд хөдөлгөж байна. Гэхдээ өмнө нь тавьсан нэг жилийн доторх өр, УБ Цахилгаан түгээх станц, Ус суваг зарим нэгэн засвар гээд 200 орчим сая төгрөгийн асуудал байна. Энэ өр төлбөрт иргэд ямар ч буруутай биш. Харин иргэд нь өөрсдөө дулааныхаа төлбөрийг бид төлөхөд бэлэн гэхдээ аваагүй байж бид даарах ёсгүй гэж гомдоллож байна. Одоогийн байдлаар эдгээр өрхийн 40 орчим хувь нь дулаанаа аваад цаана нь олон өрх авч чадаагүй байна. Бид хийсэн ажлаа үр дүнтэй цааш нь үргэлжлүүлж хэрэгжүүлмээр байна. Энэ их хөрөнгө оруулалт бүхий хувьсгал хийсэн ажил хийчхээд, өнөөдөр орон сууцны айлууд дулаанаа аваад явдагтай адил, гэр хороолол хашаандаа сайхан амьдарч байгаа инженерийн таван шийдэл хийсэн айлууд адилхан байх ёстой. Энэ шинэ ажлыг үргэлжлүүлж, үр дүнд хүргэн иргэд хохирохгүй байх тал дээр Нийслэл юу хийж байна вэ? Би энэ асуудлыг өнгөрсөн долоо хоногт тавьсан. Айлууд тэнд даарч байна. 200 айл өрхийн цаана 700 аад хүмүүс амьдарч байна. Тийм учраас энэ асуудлыг ойрын хугацаанд шийдэж тэдгээр айлуудын дулааныг өгөх хэрэгтэй байна. Үүссэн өр төлбөр болох 100 гаруй сая төгрөгийн асуудлуудыг түгээхэд Ус сувагт өгч энэ асуудалд цэг тавьж өгнө үү? Энэ асуудал ч нийслэлийн өвөлжилтийн нэг хэсэг гэж бодож байна. 
Улаанбаатар хотын захирагчийн үүрэг гүйцэтгэгч Ж.Батбаясгалан хариуллаа.