УИХ-ын чуулганы хуралдаан өнөөдөр /2020.11.27/ 10.00 цагаас эхэллээ. Чуулганы хуралдаанд Монгол Улсын Ерөнхийлөгч Х.Баттулга оролцож, үг хэллээ. 2021 оны төсөв баталсантай холбоотойгоор Монгол Улсын Ерөнхийлөгч Х.Баттулга төсөвт бүхэлд нь хориг тавиад байгаа юм.

Тэрээр Шүүхийн багц хуулийн төслийг энэ оны дөрөвдүгээр сарын 23-нд өргөн барьсан. Уг хуулийн төслийг УИХ-ын чуулганаар өнгөрсөн долоо хоногт хэлэлцэхийг дэмжээгүй юм.

Монгол Улсын Ерөнхийлөгч Х.Баттулга, "Миний өргөн мэдүүлсэн Шүүхийн багц хуулийн төслийг УИХ хэлэлцсэн болоод буцаалаа. Тиймээс Үндсэн хуульд заасан заасан бүрэн эрхийнхээ хүрээнд өөрийн байр сууриа чуулганы индэр дээрээс илэрхийлж байна. Үндсэн хуульд орсон өөрлөлтийн хүрээнд боловсруулсан шүүхийн багц хуулийг хэт улс төржсөн, иргэд олон нйитийг төөрөгдүүлсэн, үндэсний эв нэгдлийг хангах төрийн үйл ажиллагааны үндсэн зарчмыг бүдүүлгээр зөрчсөн нэн болхи үзэл суртлын хүрээнд, нэгдмэл улсын ёсонд огт нийцэхгүй, монголын төрийн уламжлалд үл зохицох байдлаар хандах болсонд харамсаж уг хуулийн төслүүдээ татан авч байна.

Шүүхийн асуудал бол хэдэн шүүгчийн асуудал биш, шударга нийгэм байгуулах, ард түний хувь заяаг шийэх онцгой шийдвэр гаргагчид хамаарах өргөн хүрээний асуудал. Тиймээс шүүхийн багц хуулийн өөрчлөлт шинэчлэл нь улс төрийн нам, явцуу ашиг сонирхлыг хангах бус иргэн бүр хүний өмнө эрх тэгш байхыг хангах юм. Татвар төлөгчдийн мөнгийг цувчуулчихаад торгуулаад өнгөрдөг, энгийн иргэн шоронд ордог увайгүй байдлыг халах тодорхой зорилтын хүрээнд олон талын оролцоог хангасан, авах гээхийн ухаан зарж, зөв оновчтой бодлогыг олоход чиглэсэн байдлаар асуудалд хандвал зохих байлаа.

Тухайлбал, НДС-гийн 340 тэрбум төгрөг цувчуулсан УИХ-ын гишүүн асан Б.Ундармаа 13 сая төгрөгөөр торгуулаад өнгөрч байхад айлын цонхоор нэвтэрч 50 мянган төгрөг хулгайлсан иргэн хоёр жилийн ял авч Ерөнхийлөгчөөс уучлал гуйж байх жишээтэй.

Би Үндсэн хуульд нэмэлт өөрчлөлт оруулах асуудалд оролцохдоо шударга нийгэм байгуулах ганцхан зарчмыг баримталж ШЕЗ, Шүүхийн ёс зүйн хороог томилох бүрэн эрхээсээ татгалзсан. Шударга бус хонгил байгуулсан ерөнхийлөгчдөөс бүрэн эрхээ нэмж байгаагүй, харин ч татгалзаж байсан анхны ерөнхийлөгч болсон. Аль нэг улс төрийн нам, бүлэглэл шударга бусын хонгил байгуулахыг би тэвчихгүй" хэмээв.

Тэрбээр, Засгийн газраас өргөн мэдүүлсэн шүүхийн багц хуульд өөрийн саналаа уламжилж, сайн мууг нь тунгаасан, оновчтой, эрсдэл хийдэлгүй хууль гаргахыг уриалж, өөрийн санаачилсан хуулийн төслийнхөө зарчмын зөрүүтэй саналыг зүйл бүрээр нь тайлбарлав.

Хуралдаанаар дараах асуудлыг хэлэлцэхээр товложээ.

Монгол Улсын 2021 оны төсвийн тухай хууль баталсантай холбогдуулан авах арга хэмжээний тухай" Улсын Их Хурлын тогтоолын төсөл /эцсийн хэлэлцүүлэг/;
Гаалийн албан татвараас чөлөөлөх тухай хуулийн төсөл /Засгийн газар 2020.11.20-ны өдөр өргөн мэдүүлсэн, хэлэлцэх эсэх/;
Нэмэгдсэн өртгийн албан татвараас чөлөөлөх тухай хуулийн төсөл /Засгийн газар 2020.11.20-ны өдөр өргөн мэдүүлсэн, хэлэлцэх эсэх/;
Монгол Улсын шүүхийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Монгол Улсын Ерөнхийлөгч 2020.04.23-ны өдөр өргөн мэдүүлсэн, хэлэлцэх эсэх/;
Шүүгчийн эрх зүйн байдал, сахилга, хариуцлагын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Монгол Улсын Ерөнхийлөгч 2020.04.23-ны өдөр өргөн мэдүүлсэн, хэлэлцэх эсэх/;
Хуульчийн эрх зүйн байдлын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Монгол Улсын Ерөнхийлөгч 2020.04.23-ны өдөр өргөн мэдүүлсэн, хэлэлцэх эсэх/;
Улсын Их Хурлын гишүүн Д.Бат-Эрдэнээс Монгол Улсын Ерөнхий сайдад хандан “Монгол Улсын хэмжээнд усны харилцааг зохицуулж буй хууль тогтоомжийн хэрэгжилтийн байдал, тэдгээрийн уялдаа холбооны талаар” тавьсан асуулгын хариу сонсох.

Ерөнхийлөгч Х.Баттулга чуулганд оролцож үг хэллээ