“СҮРЬЕЭГҮЙ АЗИ ТИВИЙГ БИЙ БОЛГОХ АРГА ЗАМЫГ ЭРЭЛХИЙЛЭХ НЬ” олон улсын эрдэм шинжилгээний гуравдугаар цахим хурал боллоо.

Хуралд БНСУ, Япон, Тайвань, Тайланд, Камбож, Зүүн Тимор болон манай улсын сүрьеэгийн салбарын албан тушаалтанууд оролцлоо.

Сүрьеэ өвчин нь дэлхий дахинд хүн төрөлхтөний нас баралтын тэргүүлэх 10 шалтгааны нэг болж байна. Энэ өвчин нь эмчлэгдэж эдгэрдэг хэдий ч 2000 оноос хойш дэлхий нийтээр 30 сая гаруй хүн нас барж байгаагийн дийлэнх нь Ази болон Африкийн улс орнуудад тохиолдож байна. Хэдийгээр дэлхий нийтэд covid-19 цартахал нийгмийн эрүүл мэндийн тулгамдсан асуудал болж байгаа ч бусад халдварт өвчний тусламж үйлчилгээг орхигдуулахгүй байх нь чухал юм.

Сүүлийн жилүүдэд Ази тивийн улс орнуудын нийгэм эдийн засгийн үзүүлэлт сайжирсан хэдий ч сүрьеэгийн тархалт өндөр байгаа нь маш харамсалтай байгаа бөгөөд Азийн улс орнууд нэгдэн сүрьеэгийн эсрэг тэмцэх хамтын ажиллагааг эрчимжүүлэх хэрэгцээ шаардлага байна. Иймд Монгол, БНСУ, Тайван, Тайланд, Камбож, Зүүн-Тимор болон Монгол зэрэг орнууд хамтран өөрийн орны сүрьеэгийн өнөөгийн нөхцөл байдал, цаашид хэрхэн хамтарч ажиллах талаар хэлэлцэх, харилцан туршлага солилцох зорилгоор өнөөдрийн олон улсын хурлыг цахим хэлбэрээр зохион байгууллаа.

Монгол улсад сүрьеэ, ялангуяа эмэнд тэсвэртэй сүрьеэ нэмэгдэж байгаа төдийгүй, манай хөрш зэргэлдээ орнуудад сүрьеэгийн өвчлөл өндөр байна. Дэлхий дахинд бүртгэгдэж байгаа эмэнд тэсвэртэй сүрьеэгийн 47% нь БНХАУ, ОХУ болон Энэтхэг улсад бүртгэгдсэн байна. Олон эмэнд тэсвэртэй сүрьеэгийн өвчлөл манай хөрш зэргэлдээ ОХУ, БНХАУ болон манай улсад өндөр байна.

Иймд өнөөдрийн энэхүү олон улсын хурлаар дээрх асуудлын хүрээнд бүс нутгийн хэмжээнд сүрьеэ өвчний эсрэг хамтран ажиллах, энэ өвчний хяналтыг шинэ шатанд гаргах чиглэлээр улс орны төлөөлөгчид оролцож, цаашид хэрхэн хамтран ажиллах чиглэлээр зөвшилцлөө.