Төсвийн байнгын хорооны өнөөдрийн \2020.12.25\ хуралдаанаар Засгийн газраас 2020 оны 12 дугаар сарын 16-ны өдөр өргөн мэдүүлсэн Татварын алданги, торгуулиас чөлөөлөх тухай хуулийн төслийг хэлэлцлээ.

Хуулийн төслийн талаарх хэлэлцүүлгийн үеэр УИХ-ын гишүүд төсөл санаачлагчаас асуулт асууж, санал хэллээ.

УИХ-ын гишүүн Ц.Даваасүрэн асуулт асуулаа:

Татварын торгуулийг чөлөөлж байгаа асуудлыг хавтгайруулахгүй байх хэрэгтэй. Байнгын хорооноос зарчмын зөрүүтэй санал гаргаад өндөр ашигтай ажиллаж байгаа уул уурхай, банкны гэсэн ашигтай салбарууд байна. Эдгээр байгууллагуудыг хамруулахгүй гэсэн заалт оруулвал ямар вэ? Тэгэхгүй бол үүнийг далимдуулж хэрэглэхдээ томоохон татвар төлөгчид удаашруулах зүйл гарвал төсөв, орлого хүнд энэ үед төвөгтэй. Үүнийг буруугаар ашиглах хүн байж л байгаа. Алданги торгуулийн асуудлыг хавтгайруулмааргүй байна. Энд зарчмын зөрүүтэй санал оруулвал ямар вэ?

Түүний асуултанд Төсвийн байнгын хорооны дарга Б.Жавхлан хариуллаа.

Нийгмийн даатгал үндсэн шийтгэл биш торгууль, алдангаас чөлөөлөх асуудал байгаа. НД-аа цагт нь дорвитой төлөөд явдаг ААН-үүд, цар тахлын үед хүндрэл учраагүй төлөөд явж байгаа ААН-үүд аль болох хугацаандаа төлөөд явах байх. Айхтар бултах зүйл гарахгүй байх гэж бодож байна.

Түүний асуултанд Хөдөлмөр нийгмийн хамгааллын сайд А.Ариунзаяа хариуллаа.

Хэрэв ийм шийдвэр гарвал уриалж дуудахаас өөр аргагүй. Цахилгаан болон бусад төлбөрөөс чөлөөлөхөд тусгайлж уул уурхай, крипто валют, улсын төсөвт байгууллагууд гээд тодорхой салбаруудыг чөлөөлөхгүй гэсэн шийдвэрийг гаргасан байсан. Нийгмийн даатгалын сангийн хувьд нэлээд хүндрэлтэй байгаа.

Ц.Даваасүрэн: Алданги, торгуулийг хавтгайруулахгүй байх тал дээр анхаарах ёстой