Н.Наранбаатар: Монгол хүн ажиллаж чадах ажил дээр заавал гадаад ажилтан ажиллуулах шаардлагагүй
Улсын Их Хурлын чуулганы өнөөдрийн (2020.12.25) үдээс хойших нэгдсэн хуралдаанаар Засгийн газраас өргөн мэдүүлсэн Ажиллах хүчний шилжилт хөдөлгөөний тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд-ийн хэлэлцэх эсэхийг хэлэлцлээ.
Хуулийн шинэ төсөл 5 бүлэг, 41 зүйлтэй байхаар боловсруулж зарчмын хэд хэдэн шинэ зохицуулалтуудыг тусгасан байна.
УИХ-ын гишүүн Н.Наранбаатар
Энэ хаврын байдлаар Монгол улсад 4300 гаруй гадаад иргэд байна гэсэн байна. Түүний 52% нь зам барилга, 32% нь уул уурхайд байна гэж байна. Манай говийн бүсэд уул уурхай дээр гадаад их бий. Очоод харахаар Монгол хүн хийж болохоор ажлууд байдаг. Мөн уурхай дээр цалин маш зөрүүтэй байдаг. Гадаад, Монгол ажилтан ижил ажлыг цалингийн ялгаатай хийдэг. Үүнийг хэрхэх вэ?
Мөн гадаад ажиллаж байгаа Монголчуудаа бүртгэх талаар ямар зохицуулалт оруулсан байгаа вэ?
Хөдөлмөр, Нийгмийн хамгааллын сайд А.Ариунзаяа
Хуульд тухайн орон нутагт ажиллах хүчин ажиллуулж байгаа ААН нь тухайн орон нутгийн хөдөлмөрийн мэдээллийн санд мэдээллээ байршуулна гэж заасан байгаа. Энд орон нутгийн удирдлагын эрх хэмжээг нэмэгдүүлж зааж өгсөн.
цалин хөлсний асуудлыг энэ хуулиар зохицуулаагүй. Харин Хөдөлмөрийн тухай хуулийн шинэчлэлд "адил төрлийн ажил адил цалинтай байна" гэсэн зохицуулалт байгаа.
