Улсын Их Хурлын чуулганы өнөөдрийн (2020.12.25) үдээс хойших нэгдсэн хуралдаанаар Засгийн газраас өргөн мэдүүлсэн Ажиллах хүчний шилжилт хөдөлгөөний тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд-ийн хэлэлцэх эсэхийг хэлэлцлээ. 

Хуулийн шинэ төсөл 5 бүлэг, 41 зүйлтэй байхаар боловсруулж зарчмын хэд хэдэн шинэ зохицуулалтуудыг тусгасан байна.

УИХ-ын гишүүн О.Цогтгэрэл

Хуулийн үзэл баримтлалыг харахаар манай улс руу хүмүүс орж ирэх гээд байгаа юм шиг хандлагаар бичигдсэн санагдлаа. Тэгэхээр хориг саад гэдэг талаас нь харах нь зөв үү? 

Баялаг бүтээх гэдэг чинь капитал, хөдөлмөр, технологи, менежмент гээд энэ олны зүйлсийн харьцаанаас хамаардаг. Тэгэхээр зарчмын асуулт нь, ер нь гаднаас орж ирж байгаа ажиллах хүчин нь бас ялгаатай. Тухайлбал, мэдлэгтэй ажиллах хүчин орж ирэх нэг өөр, энэ өөрөө технологитойгоо, хөрөнгө буюу капиталтайгаа орж ирдэг. 

Жишээ нь, авто зам дээр авч үзэхэд, Хятадын компани технологио, ажилтнаа аваад ирэхэд л Монголын зах зээлийг эзэлчих жишээний. Харин энэ тохиолдолд бид хөрөнгөтэйгөө биш зөвхөн ажиллах хүчнийг нь оруулж ирэх үзэл баримтлалыг нь бодох хэрэгтэй. 

Дээрээс нь, гаднаас орж ирж байгаа ажиллах хүчнийг харахад, ажлын байр бий болгодог ажиллах хүчин гэж байдаг. Энэ чиглэлийг хуулийн төсөлд хөхүүлэн дэмжих ёстой.