2021.01.21

Музейн тухай хуулийн төслийг эцсийн хэлэлцүүлэгт бэлтгэнэ

УИХ-ын чуулганы нэгдсэн хуралдаанаар Музейн тухай хуулийн төслийн анхны хэлэлцүүлгийг үргэлжлүүлэн хийлээ. 

Өнгөрөгч долоо хоногт УИХ дахь МАН-ын бүлгийн зүгээс уг хуулийн төсөл дээр завсарлагаа авсан нь дуусч ийнхүү хэлэлцүүлгийг үргэлжлүүлэн эцсийн хэлэлцүүлэгт бэлтгүүлэхээр Боловсрол, соёл, шинжлэх ухаан, спортын байнгын хороонд шилжүүллээ.

Монгол Улс анх удаа Музейн тухай хуультай болж, түүнд ажиллагсад, түүх, соёлын үнэт эд өлгийн зүйлсийг хадгалан хамгаалах эрх зүйн зохицуулалттай болох гэж байна. Хуулийн төслийн ажлын хэсгийн ахлагчаар УИХ-ын гишүүн Ч.Ундрам ажиллаж байгаа бөгөөд эрдэмтэн, мэргэжилтнүүд болон ажлын хэсгийн гишүүдийн хамтаар хэд хэдэн удаагийн хурал хийж, төслийг чамбайруулж байгаа билээ. 

Музейн тухай хууль батлагдсанаар өмчийн олон хэлбэрийн музей байгуулагдаж, түүх соёлын дурсгалт зүйлс, соёлын үнэт зүйлийг хамгаалах, үйл ажиллагааны цар хүрээ, үйлчилгээний хүртээмж сайжирч нийгэм эдийн засгийн үр өгөөж нэмэгдэх боломж бүрдэнэ.

Түүнчлэн музейн зохион байгуулалтыг боловсронгуй болгох, музейн шинжлэх ухаан, боловсролын салбарт гүйцэтгэх үүрэг нэмэгдэх, иргэдийн музейгээр үйлчлүүлэх, хандах хандлагад эерэг нөлөө үзүүлж, мэдлэгийн орон зай болж хөгжих суурь тавигдах юм. 

Сэтгүүлч

Редактор Ц.Соёлмаа soko@vip76.mn