Монгол Улсын Их Хурлын чуулганы хуралдааны дэгийн тухай хуулийн 28 дугаар зүйлийн 28.1 дэх хэсэгт “Монгол Улсын Үндсэн хуулийн Гучин есдүгээр зүйлийн 2 дахь хэсэгт заасны дагуу нэр дэвшүүлсэн хүнийг Ерөнхий сайдаар томилох саналыг Монгол Улсын Ерөнхийлөгч Улсын Их Хуралд оруулснаас хойш Төрийн байгуулалтын байнгын хороо ажлын 3 өдрийн дотор хуралдаанаараа хэлэлцэж санал, дүгнэлт гаргана” заасан. Энэ үндсэн дээр Монгол Улсын Ерөнхий сайдаар томилох тухай Монгол Улсын Ерөнхийлөгчийн саналыг Ерөнхийлөгчийн Тамгын газрын дарга Ө.Шижир танилцууллаа.
Улсын Их Хурлын 2020 оны ээлжит сонгуулийн дүнгээр байгуулагдсан Засгийн газар огцорсонтой холбоотойгоор Монгол Ардын Намаас Улсын Их Хурлын гишүүн Лувсаннамсрайн Оюун-Эрдэнийг Монгол Улсын Ерөнхий сайдад нэр дэвшүүлэн, 2021 оны нэгдүгээр сарын 22-ны өдөр Монгол Улсын Ерөнхийлөгчид өргөн мэдүүлжээ.
Монгол Улсын Үндсэн хуулийн Гучин есдүгээр зүйлийн 2 дахь хэсэгт заасны дагуу Монгол Улсын Ерөнхийлөгч, Улсын Их Хурлын гишүүн Лувсаннамсрайн Оюун-Эрдэнийг Монгол Улсын Ерөнхий сайдаар томилох саналыг Улсын Их Хуралд оруулж буйг Ерөнхийлөгчийн Тамгын газрын дарга Ө.Шижир танилцуулсан.
Монгол Улсын Ерөнхийлөгчийн саналтай холбогдуулан, нэр дэвшигчээс Улсын Их Хурлын гишүүн Ж.Сүхбаатар, Б.Пүрэвдорж нар асуулт асууж, үг хэллээ. Монгол Улсын Үндсэн хуульд оруулсан нэмэлт, өөрчлөлтөөр гүйцэтгэх эрх мэдлийг бэхжүүлсэн бөгөөд Ерөнхий сайд төрийн хууль биелүүлэх ажлыг Улсын Их Хурлын өмнө хариуцахаар заасныг Ж.Сүхбаатар гишүүн онцолсон бол Засгийн газрыг тогтвортой ажиллуулахад онцгой анхаарах саналыг Б.Пүрэвдорж гишүүн хэлж байв. Монгол Улсын Үндсэн хуулийн үзэл санааг хэрэгжүүлэх, нэмэлт, өөрчлөлтийг “амилуулах” чиглэлээр Улсын Их Хурал олон ажлыг хийж байгаа бөгөөд нэр дэвшигчийн энэ талаарх байр суурийг тодруулсан.
Гишүүдийн асуултад Улсын Их Хурлын гишүүн, нэр дэвшигч Л.Оюун-Эрдэнэ хариулахдаа "Монгол Улсын Үндсэн хуулийг бүх иргэн, бүх төрийн байгууллага дагаж, мөрдөх үүрэгтэй. Засгийн газар ч энэ хүрээнд ажиллаж үүрэгтэй. Энэ үүргээ биелүүлнэ. Хууль тогтоох, гүйцэтгэх засаглал, шүүх эрх мэдэл харилцан хяналт, тэнцэлтэй байх ёстой. Шүүх эрх мэдэл бие даасан, хараат бус, парламент нь Засгийн газар чиглэл өгөх, үүнийг Засгийн газар хэрэгжүүлэх үүрэгтэй. Энэ хяналт, тэнцлийг хангаж ажиллана. Хуулийн засаглалтай байх ёстой. Ийм итгэл үнэмшлээр ажиллах болно" гэлээ.
Санал ийнхүү дэмжигдсэн тул Байнгын хорооны дарга Л.Энх-Амгалан “Монгол Улсын 32 дахь Ерөнхий сайдыг томилох тухай” Улсын Их Хурлын тогтоолын төслийг танилцуулсан. Монгол Улсын Үндсэн хуулийн Хорин тавдугаар зүйлийн 1 дахь хэсгийн 6 дахь заалт, Гучин есдүгээр зүйлийн 2 дахь хэсэг, Монгол Улсын Засгийн газрын тухай хуулийн 21 дүгээр зүйлийн 21.4 дэх хэсэг, Монгол Улсын Их Хурлын чуулганы хуралдааны дэгийн тухай хуулийн 28 дугаар зүйлийн 28.3 дэх хэсэг, санал хураалтын дүнг үндэслэн Монгол Улсын Ерөнхий сайдаар Лувсаннамсрайн Оюун-Эрдэнийг томилж, энэхүү тогтоолыг баталсан өдрөөс нь эхлэн дагаж мөрдөхөөр төсөлд тусгажээ. Үүгээр Төрийн байгуулалтын байнгын хорооны өнөөдрийн хуралдаан өндөрлөлөө хэмээн Улсын Их Хурлын Хэвлэл мэдээлэл, олон нийттэй харилцах хэлтсээс мэдээллээ.
Эх сурвалж: