Боловсрол, шинжлэх ухааны сайд Л.Энх-Амгалан өнөөдөр АНУ-аас Монгол Улсад суугаа Онц бөгөөд Бүрэн эрхт Элчин сайд Майкл С.Клеческиг хүлээн авч уулзлаа.

Уулзалтын хүрээнд хоёр талын хамтын ажиллагааг өргөжүүлэх, боловсрол, шинжлэх ухаан, инновац, технологийн салбарт хэрэгжүүлж буй хөтөлбөрүүдийг өргөжүүлэн хөгжүүлэх талаар харилцан санал солилцлоо.

Хоёр орны түншлэлийн хүрээнд АНУ-аас Монгол Улсад жилд 120 хүний тэтгэлгийг зохион байгуулдаг бөгөөд өнөөдрийн байдлаар 2972 монгол оюутан АНУ-д суралцаж байна. Уулзалтын эхэнд Боловсрол, шинжлэх ухааны сайд Л.Энх-Амгалан АНУ-ын Засгийн газраас хэрэгжүүлж буй Фулбрайт, FLEX хөтөлбөрийн оюутны тоог нэмэгдүүлэх хүсэлтэй байгаагаа илэрхийллээ.

Монгол оюутан, сурагчдыг АНУ-ын их, дээд сургуулиудад хөнгөлөлттэй нөхцөлөөр, дотоодын оюутны төлбөрөөр суралцуулах боломжийг судлах саналыг тавилаа. Одоогийн байдлаар манай улсын зүгээс Жорж Мэйсоний их сургууль, Канзас хот дахь Миссоүри мужийн их сургууль, Флорида мужийн их сургууль, Мичиган мужийн их сургуультай 2+2 хөтөлбөрийг хэрэгжүүлж, хамтран ажиллах сонирхлоо илэрхийлсэн. Энэ хүрээнд Жорж Мэйсоний их сургуультай 2+2 хөтөлбөрийн гэрээнд гарын үсэг зурахаар болсноо дуулгалаа.

Монгол Улсын Засгийн газар англи хэлийг хоёрдогч хэл болгох зорилго тавин ажиллаж байна. Иймд ерөнхий боловсролын 840 гаруй сургуульд англи хэлний багшийг үе шаттайгаар бэлтгэхэд хамтран ажиллаж, сайн дурын багш нар болон тэтгэвэрт гарсан багш нарыг авчрах сонирхолтой байгаагаа Боловсрол, шинжлэх ухааны сайд хэллээ.

Мөн Боловсрол, шинжлэх ухааны яам, АНУ-ын Номхон далайн командлал хоорондын байгуулсан хүмүүнлэгийн тусламжийн харилцан ойлголцлын санамж бичгийн хүрээнд манай улсад 50 хүүхдийн багтаамжтай зургаан цэцэрлэгийг 2017-2020 онд барьж хүлээлгэн өгсөн. Энэ онд хоёр цэцэрлэгийг ашиглалтад оруулахаар ажиллаж байна. Цаашид энэ чиглэлээр хамтран ажиллах хүсэлтэй байна гэсэн юм.

Үүнээс гадна шинжлэх ухаан, инновацийн төвийн кластерын менежментийг хийх, сайн зөвлөхүүдийг урьж, хамтарч ажиллах сонирхол байгаагаа сайд Л.Энх-Амгалан хэллээ. Шинжлэх ухаан, инновацийн чиглэлээрх хамтын ажиллагаагаа өргөжүүлэн хөгжүүлэх саналаа хэлэв.

Уулзалтын үеэр АНУ-аас Монгол Улсад суугаа Онц бөгөөд Бүрэн эрхт Элчин сайд Майкл С.Клечески Боловсрол, шинжлэх ухааны сайдын саналыг дэмжиж байгаагаа илэрхийлээд Фулбрайтын тэтгэлэгт хөтөлбөрт суралцах оюутны тоог нэмэгдүүлэх талаар санал солилцож ажиллах бүрэн боломжтой гэв.

Мөн шинжлэх ухаан, инноваци, технологийн салбарт хамтарч ажиллах, төвийн кластрын менежментийг хийхэд хамтарч ажиллах боломж байгаа хэмээсэн юм. Тэрбээр хүүхдийн цэцэрлэгийн хамран сургалтыг нэмэгдүүлэх зорилгоор дахин хоёр цэцэрлэг барьж өгөхөө илэрхийллээ.

Кластерын менежментийг АНУ-тай хамтран хийх сонирхлоо илэрхийллээ