СХД-ийн засаг дарга Н.Алтаншагай тус дүүргийн Тохижилт нийтийн аж ахуйн хэлтсийн дарга М.Энхманлай, Газар зохион байгуулалтын албаны дарга Б.Батцагаан, Агаарын бохирдолтой тэмцэх тасгийн дарга Ж.Нямхүү болон ажлын хэсгийн бүрэлдэхүүнтэй хамт дүүргийнхээ нутаг дэвсгэрт халиа дошин болон шар усны үерээс болж нөхцөл байдал хүндэрсэн 33, 35 дугаар хороодод ажилласан байна.

СХД-ийн 33 дугаар хороо буюу Тахилтын наймдугаар гудамжны хэсэг усанд автсанаар иргэд хашаанаасаа гарах, автомашин зорчих боломжгүй болж 70 гаруй өрхийн дунд хүндрэл үүсээд байна.

Засаг дарга Н.Алтаншагай нь тус хорооны иргэдийн төлөөлөлтэй уулзаж үүссэн нөхцөл байдалтай газар дээр нь танилцжээ. Иргэд өнгөрсөн жил хороотойгоо хамтран ойролцоох булгийн эхэнд хамгаалалтын хашлага барьж, хоолой тавьснаас болж гуу жалга дамнан ус их хэмжээгээр орж ирэх болсон. Тиймээс усны урсгал дагуу дахин хоёр хоолой тавьж далан руу хүргэх шаардлагатай байгааг энэ үеэр хэллээ.

Ажлын хэсгийнхэн иргэдийн хүсэлтийн дагуу дахин тооцоо судалгаа хийж усанд автаагүй айл өрхийг эрсдэлд оруулахгүйгээр асуудлыг хурдан хугацаанд шийдвэрлэх үүрэг хүлээн авсан байна.

Харин 35 дугаар хороо буюу Нарангийн гол хэсэгт мөн л өнгөрсөн жил байршуулсан хоолойнууд хөлдөж, бөглөрснөөс болж гудамж талбай усанд автсан. Тиймээс тус хорооны удирдлагууд болон иргэд ихэвчлэн зорчдог гурван байршилд гүүрэн гарц барьж өгөхийг хорооны Засаг дарга ажлын хэсгийнхэнд уламжилжээ.

Мөн үерийн аман дээр болон өндөр хүчдэлийн дор зөвшөөрөлгүй буусан айлууд үерт автаж нөхцөл байдал хүнд байгаа учраас тэдгээр айлуудад зохих шаардлагыг хүргүүлж арга хэмжээ авахуулах хүсэлтийг хорооны Засаг дарга Д.Баярсайхан тавьсан байна.

Иргэдийн хүсэлтийг СХД-ийн засаг дарга Н.Алтаншагай Газар зохион байгуулалтын албаны дарга Б.Батцагаанд хороодын удирдлагуудтай хамтран ажиллаж хурдан шуурхай шийдвэрлэх, тэрхүү айлуудын газрын зөвшөөрлийг судалж, өөр суурьшлын бүсэд нүүлгэн шилжүүлэх боломж буй эсэхийг тодруулахыг үүрэг болголоо.

Халиа дошин болон шар усны үерт автсан хороодод ажиллалаа

Халиа дошин болон шар усны үерт автсан хороодод ажиллалаа