МАН-ын дарга У.Хүрэлсүх Ерөнхийлөгчийн сонгуульд нэр дэвшигчийн үнэмлэхээ гардлаа

Ерөнхийлөгчийн сонгуулийн хуулийн дагуу СЕХ өнөөдөр Монгол Улсын Ерөнхийлөгчийн сонгуульд нэр дэвшигчдэд үнэмлэх гардуулж байна. Эхний ээлжинд МАН-аас Ерөнхийлөгчийн сонгуульд нэр дэвшигч У.Хүрэлсүх үнэмлэхээ гардлаа.

СЕХ-ны дарга Д.Дэлгэрнаран:

-Монгол Улсын Ерөнхийлөгчийн сонгуульд нэр дэвшигчийн үнэмлэхийг МАН-аас нэр дэвшигч У.Хүрэлсүхэд гардуулж байна. Нэр дэвшигчийн үнэмлэх гардсанаар та сонгуулийн сурталчилгаагаа эхлүүллээ. Мөн Ерөнхийлөгчийн сонгуулийн Ерөнхий менежер Д.Амарбаясгаланд үнэмлэх гардуулж байна. Та бүхэнд амжилт хүсье гэлээ.

Ерөнхийлөгчийн сонгуульд нэр дэвшигч, МАН-ын дарга У.Хүрэлсүх:

-Надад асар их хариуцлага үүрүүлж, итгэл хүлээлгэсэн журмын нөхдөдөө чинь сэтгэлээсээ талархал илэрхийлье. Ерөнхийлөгчийн сонгууль бол зөвхөн монголчууд төдийгүй дэлхий анхаарч, ажиглаж байгаа. Энэ бол улс төрийн намын сонгууль биш Монгол Улсын төрийн тэргүүний сонгууль. Тийм учраас ил тод, хуулийн хүрээнд явуулах шаардлагатай. Сонгуульд өрсөлдөх гэж байгаа болон кампанит ажилд оролцож байгаа хүмүүст шударга өрсөлдье гэж уриалж байна. Сонгуулийн зардлыг хэмнэж, хямд зардлаар амжилттай явуулах дээр анхаарч ажиллах нь зүйтэй.

Монгол Улсын Ерөнхийлөгч бол ард түмний эв нэгдлийг илэрхийлэгч, Үндэсний аюулгүй байдлын тэргүүн байдаг. Хэрвээ би Монгол Улсын Ерөнхийлөгчөөр сонгогдвол:

Нийгэмд шударга ёсыг бэхжүүлж, эрхзүйн орчныг шинэчлэхэд анхаарна. Хууль бус, ёс бус үйл ажиллагааг таслан зогсооход анхаарч, хууль хяналтын байгууллага, шүүх, прокурорын ажиллах орчныг бий болгоход анхаарна. Хүн засагладаггүй, хууль засагладаг болгоход анхаарна.
Парламентын засаглалыг бэхжүүлэхэд анхаарч ажиллана.
Ард түмний үндэсний эв нэгдэл чухал. Ард түмнийхээ эв нэгдлийг нүдний цөгций мэт хайрлан хамгаалах болно.
Байгалийн баялагтаа эзэн монголчууд байх ёстой. Ард иргэддээ байгалийн баялгийн тэгш хуваарилалтыг бий болно.
Гадаад улс орноо төлөөлөх нь Төрийн тэргүүний гол асуудал байдаг. Гадаад харилцаандаа анхаарч ажиллана.
Хүчирхэг эдийн засагтай Монгол Улсыг бий болгоно хэмээв.

МАН-аас нэр дэвшигч У.Хүрэлсүх мэдээлэл хийснийхээ дараа сэтгүүлчдийн асуултад хариулав.

-Танай нам МАХН-тай нэгдэж байгаа. МАХН-ын дарга Н.Энхбаяр "Бүгд найрамдах улс байгуулна" гэж байсан. Та санал нийлж байна уу?

-Би улс орныхоо эдийн засгийг мэдэж байгаа. Миний мөрийн хөтөлбөри шинжлэх ухааны үндэслэлтэй боловсруулагдсан. Ардчилсан төрийг авч явж байгаа засаглал бол парламентын засаглал. Парламентын засаглалаа бэхжүүлж, Үндсэн хуулиа боловсронгуй болгоход анхаарч ажиллана.

Н.Нягт

У.Хүрэлсүх: Ард түмнийхээ эв нэгдлийг нүдний цөцгий мэт хайрлан хамгаална

У.Хүрэлсүх: Ард түмнийхээ эв нэгдлийг нүдний цөцгий мэт хайрлан хамгаална