УИХ дахь МАН-ын бүлгээс мэдээлж байна.

УИХ-ын гишүүн Ц.Мөнх-Оргил дараах мэдээллийг өглөө:

-Хөдөлмөрийн тухай хуулийг намрын чуулганаар хэлэлцэхээр хойшлуулав. Учир нь МҮЭХ болон ажлын хэсгийн ахлагчаар ажилласан би ч хуулийн төсөлд 10 хувь сэтгэл хангалуун бус байна. Гэсэн ч бид бүлгийн хурлаар ярилцаад хуулийн төслийг энэ хаврын чуулганаар батлах шийдэлд хүрлээ. Манай улсад хөдөлмөрийн зах зээл ихээхэн өөрчлөгдлөө. Уул уурхайн ажилчдын ээлж гэх мэт цоо шинэ үзэгдлүүд бий болов.

Хөдөлмөрийн тухай хуулийн төсөл дээр бид гурван ажил ажилласан. Энэ хууль ихээхэн онцлогтой. УИХ дур мэдэн энэ хуулийг батлах боломжгүй. Засгийн газар, Ажил олгогч эздийн нэгдсэн холбоо, МҮХАҮТ, МҮЭХ зэрэг олон байгууллагын зөвшилцлийн үр дүнд энэ хуулийг баталдаг. Хуулийн төсөлтэй хамт 11 хуулийн төслийг өргөн мэдүүлсэн. Одоо бидний мөрдөж буй Хөдөлмөрийн тухай хуулийг 1999 онд баталсан тул цаг үетэйгээ нийцэхгүй болсон. Иймд хуулийг шинэчлэн найруулах ажил 2005 онд эхэлсэн. 2008 онд дээрх байгууллагуудын төлөөлөл орсон ажлын хэсгийг байгуулсан.

1999 онд Засгийн газар нийт ажилчдын 80-90 хувьд нь ажил олгож байв. Өнөөдөр 180 мянган төрийн албан хаагч бий. Манай улсад нийт 1.2 сая хүн ажил хийдэг. Үлдсэн хүмүүсийг хувийн хэвшил ажлын байраар хангах боллоо. Энэ мэтээр хөдөлмөрийн зах зээл дүр төрхөө бүрэн өөрчилсөн. Хөдөлмөрийн харилцаа ч ихээхэн өөрчлөгдлөө. Ковидийн улмаас бид гэрээсээ эсвэл хагас цагаар ажиллах гэх мэт шинэ үзэгдлүүд бий болов. Зуучлагчаар дамжуулан хөдөлмөрийн харилцаа үүсгэдэг боллоо. Мөн 25 мянган туслах малчны асуудал Хөдөлмөрийн тухай хуульд огт тусаагүй. Хуулийн төслийг багцаар нь баталбал хөдөлмөрийн зах зээлд том дэвшил авчирна. Дээр нэр дурдсан байгууллагууд бүх саналаа бүрэн тусгаж чадаагүй ч зөвшилцөлд хүрч чадлаа. Бүх асуудлыг энэ хууль нэг дор шийдэхгүй. Учир нь Хөдөлмөр эрхлэлтийг дэмжих тухай хууль, Боловсролын тухай хууль гэх мэт олон хууль хөдөлмөрийн харилцааг зохицуулдаг.

УИХ-ын гишүүн, бүлгийн ахлагч Д.Тогтохсүрэн:

-Хүүхдийн мөнгөтэй холбоотойгоор улсын төсөвт тодотгол хийхээр ажиллаж байна. Халдварын тохиолдлууд өдөр бүр нэмэгдэж байгаа тул Засгийн газар энэ удаад хөл хорио биш, өмнөхөөс өөр, онцлог арга хэмжээ авах ёстой.

1999 оноос хойш мөрдөж буй Хөдөлмөрийн тухай хуулийн төслийг хаврын чуулганаар хэлэлцэнэ

1999 оноос хойш мөрдөж буй Хөдөлмөрийн тухай хуулийн төслийг хаврын чуулганаар хэлэлцэнэ