УХБ-ын “Хөдөлмөрийн хууль тогтоомжийг хэрэгжүүлэх хөдөлмөрийн хяналтын үйл ажиллагааны стратегийг төлөвлөх аргачлал”-ыг танилцуулах Гурван талт уулзалт боллоо.

Европын холбооны төсвийн дэмжлэгтэйгээр хэрэгжиж буй “Тогтвортой хөгжлийн зорилгуудтай уялдсан төсвийн төлөвлөлтөөр хөдөлмөр эрхлэлтийн шинэчлэлтийг дэмжих нь“ төслийн хүрээнд Олон улсын хөдөлмөрийн байгууллагаас “Хөдөлмөрийн хууль тогтоомжийг хэрэгжүүлэх хөдөлмөрийн хяналтын үйл ажиллагааны стратегийг төлөвлөх аргачлал”-ыг танилцуулах гурван талт цахим семинарыг өнөөдөр /2021.07.02/ зохион байгууллаа.

Уг гурван талт семинарын зорилго нь МХЕГ, МҮЭХ, МАОЭНХ-ны төлөөлөгчдөд хөдөлмөрийн хяналтын шинэ стратегийг танилцуулах, улмаар тус стратегийг хэрэгжүүлэх хүрээнд нийгмийн зөвшлийн талуудын зүгээс төслийн дэмжлэгтэйгээр хийх ажлын чиглэлийг тодорхойлох асуудал байв. Уулзалтын нээлтэнд ОУХБ-ны Үндэсний зохицуулагч П.Болормаа болон МҮЭХ-ны ерөнхийлөгч Х.Амгаланбаатар, МХЕГ-ын Хөдөлмөр нийгмийн хамгааллын хяналтын газрын дарга Л.Төгсбаяр, МАОЭНХ-ны гүйцэтгэх захирал Х.Ганбаатар нар оролцож үг хэллээ.

МҮЭХ-ны ерөнхийлөгч Х.Амгаланбаатар:

Тэрээр өнөөдрийн гурван талт уулзалт нь Хөдөлмөрийн тухай хуулийн шинэчилсэн найруулга батлагдаж байгаа өдөр болж байна. Хөдөлмөрийн тухай хуулийн шинэчлэл хөдөлмөрийн хяналтыг сайжруулах, талуудын хамтын ажиллагааг өргөжүүлэх, ялангуяа ҮЭ-ийн буюу олон нийтийн хяналтын хүрээнд ихээхэн өөрчлөлт авчирна гэж итгэж байна. МҮЭХ-ны зүгээс хөдөлмөрийн хяналтын энэхүү шинэ аргачлалыг дэмжиж байна, МХЕГ-ын өнөөгийн стратеги үйл ажиллагаанд уялдуулж хамтран ажиллах, олон нийтийн хяналтын бүтцийг чадавхижуулах боломж бүрдэнэ гэж бодож байна гээд уулзалтанд амжилт хүслээ.

Энэ удаагийн гурван талт уулзалтад МҮЭХ-ны ХХХБГ-ын дарга Ц.Отгонтунгалаг, тус газрын мэргэжилтэн Б.Даваабаяр, Д.Баттөгөлдөр, Баянхонгор аймгийн ҮЭХ-ны дарга В.Гүрсэд, Дорноговь аймгийн ҮЭХ-ны дарга С.Азжаргал болон МХЕГ, МАОЭНХ-ны нийт 25 төлөөлөгч оролцлоо. Хөтөлбөрийн дагуу Хөдөлмөрийн хяналтын аргачлалын танилцуулгыг ОУХБ-ын Хөдөлмөрийн хяналтын мэргэжилтэн Роберт Рене хийж, МХЕГ-ын Хөдөлмөр нийгмийн хамгааллын хяналтын газрын дарга Л.Төгсбаяр Мэргэжлийн хяналтын байгууллагын стратеги төлөвлөгөө (2021-2024), ОУХБ-ын төслийн менежер А.Лхагвадэмбэрэл “Тогтвортой хөгжлийн зорилгуудтай уялдсан төсвийн төлөвлөлтөөр хөдөлмөр эрхлэлтийн шинэчлэлийг дэмжих нь” төслийн хүрээнд хөдөлмөрийн хяналтын чиглэлээр төлөвлөсөн үйл ажиллагааг тус тус танилцууллаа.

Уулзалтын төгсгөлд оролцогчид асуулт асуун саналаа хэлж, “Хөдөлмөрийн хууль тогтоомжийг хэрэгжүүлэх хөдөлмөрийн хяналтын үйл ажиллагааны стратегийг төлөвлөх аргачлал”-ыг нэвтрүүлэх төслийн хүрээнд талууд хамтран ажиллах чиглэл, боломжийн талаар санал солилцон цаашид тодорхой асуудлуудаар хамтран ажиллах төлөвлөгөө гаргахаар тогтов.