Барилга, Хот Байгуулалтын сайд Б.Мөнхбаатар түрээсийн орон сууцтай холбоотой асуудлаар мэдээлэл өглөө.

Тэрбээр “Үе үеийн Засгийн газар ард түмнээ орон сууцжуулах бодлого явуулж ирсэн. 2008 оноос төрийн санхүүжилтээр орон сууцууд баригдаж, мөн ипотекийн хөтөлбөр хэрэгжиж эхэлсэн. Үүнээс хойш 100 мянга гаруй өрх ипотекийн зээлд хамрагдаж, байртай болсон байна.

Иргэд ипотекийн зээл авахын тулд урьдчилгаа 30 хувиа төлөх, нийгмийн даатгалаа төлөгч байх зэрэг тодорхой шалгууруудыг хангасан байх ёстой.

Өнөөдрийн байдлаар өрх толгойлсон эцэг эх, хөгжлийн бэрхшээлтэй иргэд, мөн бусад шалтгаантай иргэд 30 хувиа бүрдүүлж чадахгүй байгаагаас ипотекийн зээлд хамрагдаж чадахгүй байна. Эдгээр иргэдэд дэмжлэг болох үүднээс Засгийн газраас түрээсийн орон сууцны хөтөлбөрийг хэрэгжүүлж ирсэн. Өнгөрсөн хугацаанд Засгийн газраас хөдөө орон нутаг болон Улаанбаатар нийлээд 3000 гаруй орон сууцыг түрээсийн зориулалтаар ашиглуулж байна. Үүний 2000 гаруй нь Улаанбаатар хотод буюу Буянт ухаа-1, 2  болон Хангай хотхоны байрууд байдаг.

Хангай хотхоны асуудлаар Засгийн газарт гурван асуудлыг тавьсан. Өнөөдөр иргэд 240-400 мянган төгрөгөөр тухайн байрыг түрээсэлж байгаа. 2017 онд гарсан журамд иргэд байрыг түрээсэлж байгаад өмчлөх боломжийг бий болгосон. Энэ журман дээр хоёр төрлийн боломжийг олгосон.

Нэгд, сар бүрийн түрээсээсээ гадна илүү мөнгө төлөөд, урьдчилгаа 30 хувьд хүрсний дараагаар ипотекийн зээлд хамрагдаж болно. Хоёрт, тодорхой хугацаанд түрээсээсээ илүү хэмжээний мөнгийг төлөх байдлаар өмчилж болно гэсэн хоёр боломжийг тусгаж өгсөн.

Сүүлийн үед иргэд Хангай хотхонтой холбоотойгоор метр квадратын зөрүүний асуудлыг гаргаж ирээд байгаа. 2016 оны тавдугаар сарын 31-ний Засгийн газрын хуралдаанаар тухайн үеийн барилгын сайдад даалгаснаар Хангай хотхоноос 15 тэрбум төгрөгөөр орон сууц худалдаж авах тогтоолыг гаргасан байдаг. Үүнтэй холбоотойгоор Хангай хотхоноос 7974 м.квадрат талбайн нэг ам метр тутмын үнийг 1 сая 880 мянган төгрөгөөр хувааж авсан байдаг. Тухайн үедээ төрийн албан хаагч байгууллагууд иргэдтэй гэрээ байгуулахдаа гэрээний хавсралт болох мэдэгдэл дээрээ м.квадрат нь 1 сая 280 мяннга байхаар тусгасан байдаг. Энэ асуудлаас болж хууль хяналтын байгууллагаас тодорхой албан тушаалтнуудыг шалгаж байгаа.

Түүнчлэн, иргэдийн ярьж байгаа өөр нэг асуудал бол “Бид таван жил энэ байрыг түрээсэллээ. Төлсөн түрээсийн мөнгөө тухайн байрыг өмчилж авах урьдчилгаанд тооцуулмаар байна” гэж байгаа. Гэтэл энэ нь хууль эрх зүйн хувьд боломжгүй. Тухайн төлсөн түрээсийн мөнгө тухайн байрны СӨХ болон цэвэрлэгээ, хогонд төлөгддөг учир тэр төлбөрийг урьдчилгаанд тооцох ямар ч эрх зүйн акт боломж байхгүй гэдгийг хэлмээр байна. Харин та түрээсийн төлбөрөөсөө илүү төлөлт хийгээд явсан бол тэр нь урьдчилгаа болон өмчлөх эрх нь үүснэ” гэлээ.