Нийслэлийн Засаг дарга бөгөөд Улаанбаатар хотын захирагч Д.Сумъяабазар сайжруулсан шахмал түлшний үйлдвэрлэл, түгээлтийн асуудлаар "Тавантолгой түлш" компаниас тайлбар мэдээлэл авсан.

"Тавантолгой түлш" ХХК-ийн захирлын орлон гүйцэтгэгч Г.Ундармаа "Нийт 588 ажилтан ажиллаж байна. Баруун бүсийн нэг, хоёр, гуравдугаар үйлдвэр ажиллаж байгаа. Өнөөдөр дөрөвдүгээр үйлдвэр ашиглалтад орно. Зүүн бүсийн үйлдвэр дээр дахин боловсруулах хоёр шугам өнөөдрөөс ажиллаж эхэлж байна. Өчигдрийн байдлаар 1200 тонн түлш үйлдвэрлэсэн. Барьцалдуулагч 1,698,259 тонны нөөцтэй байгаа.

Нийтдээ 281 борлуулалтын цэг байна. Энэ долоо хоногт 350-д хүргэнэ. Нөөц тасалдах болсон шалтгааныг та бүхэн мэдэж байгаа. Засгийн газрын хуралдааны тэмдэглэлээр 2021 оны 2-р сарын 10-ны өдрийн хуралдаанаар манай баруун бүсийн үйлдвэрийг зогсоож, зүүн бүсийн үйлдвэр рүү нүүлгэх шийдвэр гарсантай холбогдуулаад 4-р сараас манай үйлдвэр зогссон байгаа. Өнөөдрийг хүртэл бид бүхэн 72 мянган тоннын түлшний нөөц бүрдүүлсэн" гэв.

Нийслэлийн Засаг дарга бөгөөд Улаанбаатар хотын захирагч Д.Сумъяабазар "Улаанбаатар хотын гэр хорооллын айлуудын дулаан хангамжид асуудал үүслээ. Бид нар санхүүжилтээ шийдээд өгчихсөн байдаг. Тэгээд ажилчдынхаа урамшуулал, цалингаа тавьж чадахгүй болохоор чинь тэр хүнд нөхцөлд хэн ажиллах юм бэ? Үүссэн асуудал хүсэлтүүдээ яаралтай хэлэлцээд, албан бичиг ирүүлмээр байна. Ажил хаялт болсон шалтгааны эх үүсвэр нь цалингийн асуудал юм байна лээ шүү дээ. Санал солилцмоор байна" гэлээ.

Д.Сумъяабазар: Цалингаа тавьж чадахгүй болохоор тийм хүнд нөхцөлд хэн ажиллах юм