УИХ-ын чуулганы өнөөдрийн \2021.10.08\ нэгдсэн хуралдаанаар УИХ-ын гишүүн Д.Ганбатаас Монгол Улсын Ерөнхий сайд Л.Оюун-Эрдэнэд хандан "Нүүрс тээврийн салбарт хэрэгжиж буй тогтоол, шийдвэрийн хэрэгжилтийн байдал, цаашид Засгийн газраас авч хэрэгжүүлэх арга хэмжээний талаар" тавьсан асуулгын хариуг сонсов.

ЗТХ-ийн сайд Л.Халтар сайд асуулгын хариуг танилцууллаа.

Асуулгын хариуг ЗТХ-ийн сайд Л.Халтар чуулганд танилцуулсан юм. Цар тахлаас сэргийлэх үүднээс энэ оны гуравдугаар сараас ЗТХЯ, ГХЯ, ЗТХЯ-наас энэ оны гуравдугаар сарын 18-наас Цагаан хадны суурьшлын бүсийн иргэд, экспортын жолооч нарыг дархлаажуулсан гэдгийг тэрбээр танилцуулгынхаа эхэнд онцлов.

Өнөөдрийн байдлаар Тавантолгойгоос Гашуунсухайт рүү нүүрс тээвэрлэдэг Монгол Улсад бүртгэлтэй 244 аж ахуйн нэгж, 16 715 жолооч байгаа аж. БНХАУ-аас Ганцмод боомтын нэвтрүүлэх хүчин чадалд тохируулсан “С” зөвшөөрлийн бичгийг 6000-аас доош тээврийн хэрэгсэлд олгох шаардлага тавьж байгаа. Үүнтэй холбоотойгоор нүүрс тээврийн компаниудын шинээр худалдаж авсан тээврийн хэрэгслүүдийг Ганцмод боомтод бүртгүүлэх ажил удаашралтай байгааг Л.Халтар сайд мөн онцолсон юм. Түүнчлэн “Эрүүл мэндээ хамгаалж, эрүүл мэндээ сэргээх 10 их наядын цогц хөтөлбөр”-ийн хүрээнд нүүрс тээврийн хоёр аж ахуйн нэгж 766 сая төгрөгийг гурван хувийн хүүтэй зээл авсан байгааг дурдлаа.

Нүүрс тээврийн салбарт үүсэж буй хүндрэлийг шийдвэрлэх хүрээнд хувийн хэвшлийн хөрөнгө оруулалтаар Өмнөговь аймгийн Цогтцэций суманд Тээвэрчдийн хотхон цогцолбор, Ханбогд суманд “Тайван зогсоол” үйлчилгээний байгууламж барьж, эхний хэсгийг ашиглалтад оруулжээ. Мөн Тавантолгой-Гашуунсухайтын автозамын дагуу 15-25 км тутамд түр зогсох цэг, хогийн цэг, засварын цэг байгуулж дууссан байна. Тал нутгийн зам компани Тавантолгой-Гашуунсухайтын хатуу хучилттай автозамыг концессын гэрээний дагуу тавьж буй бөгөөд одоогоор 38 хувийн гүйцэтгэлтэй байгааг ЗТХ-ийн сайд онцоллоо.

Тэрбээр, “Тавантолгой-Гашуунсухайтын төмөр замын инженерийн нарийвчилсан зургийг баталж, байгаль орчны нөлөөллийн үнэлгээ хийж, төслтийг эхлүүлсэн. Одоогоор бүтээн байгуулалт 69.4 хувийн гүйцэтгэлтэй байна. Уг төмөр замыг хилийн боомт хүртэл өргөн царигаар тавихаар УИХ шийдвэрлэсэн. Хил дээр хоёр талын төмөр замыг холбох талаар БНХАУ-тай хэлэлцээ хийж байгаа” гэв.

Асуулгатай холбогдуулан гишүүд асуулт асууж, хариулт авлаа

Монгол Улсад нүүрс тээврийн 244 аж ахуйн нэгж, 16 715 жолооч бүртгэлтэй байна