УИХ-ын Хууль зүйн байнгын хорооны хуралдаанаар Монгол Улсын 2022 оны төсвийн тухай, Нийгмийн даатгалын сангийн 2022 оны төсвийн тухай, Эрүүл мэндийн даатгалын сангийн 2022 оны төсвийн тухай, Ирээдүйн өв сангийн 2022 оны төсвийн тухай хуулийн төслүүдийн хэлэлцүүлгийг хэлэлцлээ.

Хэлэлцэж байгаа асуудалтай холбогдуулан гишүүд асуулт асуулаа.

УИХ-ын гишүүн Д.Батлут: Ирээдүйн өв санг 2030 он хүртэл гар хүрэхгүй зогсоосон байсан. Гэтэл одоо хүүхдийн мөнгөтэй холбож өгч байх шиг байна. Хүүхдийн мөнгө олголт ирээдүйн өв сангаас олгогдох бол хэдий хэр хугацаанд үргэлжлэх вэ? Энэ хугацаа дуусахад сангаа нөхөн бүрдүүлэх боломжтой юу?

Эдийн засгийн хүндрэлтэй нөхцөл байдалд Монгол Улсын төрийн бодлого бүсээ чангалах дээр байх болов уу. Тийм хууль эрхзүйн орчныг бүрдүүлэх хэрэгтэй. Тухайлбал, Төрийн өмчийн компаниудын тухай хууль байна. Монгол Улс нэгдсэн нэг л төсөвтэй. Төрийн өмчит компаниудын тухай хуулийг бид яаралтай оруулж ирж шийдэх ёстой. Б.Жавхлан сайд энэ дээр сайн ажиллаж байгаа гэж би ойлгосон. Өнгөрсөн жил 80 тэрбум төгрөг төрийн компаниудаас улсын төсөвт орж ирсэн бол энэ жил 460 гаран тэрбум болсон. Энэ бол Сангийн сайд сайн ажиллаж байгаа хэлбэр.  Энэ мэт дотооддоо нэмэлт санхүүжилтийн эх үүсвэр олох боломж олдсон. Үүн дээр ямар бодлого барьж ажиллах вэ?

Саяхан бид Эрүүл мэндийн багц хуулийн хэрэгжилттэй холбоотой асуудлаар эрүүл мэндийн салбаруудаар ажилласан. Энэ дунд тендертэй холбоотой, өндөр үнэтэй бүтээгдэхүүн нийлүүлдэг асуудал байсан. Иймээс бид Тендерийн тухай хууль дээрээ өөрчлөлт хийх хэрэгтэй. Бид өөрчлөлт хийж олон улсын буюу шууд худалдан авалт хийх боломжуудыг гаргаж өгөх хэрэгтэй. Тендерийн тухай хуульд нэг л заалт байгаа нь “Шаардлагатай бол олон улсын байгууллага буюу дамжуулан худалдан авалт хийнэ” гэсэн байна. үүнийг төгс байдлаар боловсруулж өгөх хэрэгтэй.

Дотооддоо үйлдвэрлэдэггүй бүтээгдэхүүнээ шууд үйлдвэрлэгчээс нь авах боломжийг бүрдүүлж өгөх хэрэгтэй. Уулын баяжуулах Эрдэнэт үйлдвэр ноднин ийм ажиллагаа зохион байгуулсны дүнд 150 тэрбум төгрөг хэмнэсэн. Ганцхан үйлдвэр ингэж хэмнэж байхад олон үйлдвэр, төрийн өмчит компаниуд ийм хэмнэлт хийж чадах юм бол маш том хөрөнгийг бий болгоно. Тэр чинээгээрээ төсөвт ачаалал бага ирнэ. Эрүүл мэндийн даатгалын сан илүү хүртээмжтэй хэрэгжиж явах боломж бололцоо бүрдэнэ. Энэ чиглэлээр Сангийн сайд юу бодож байна вэ? Ирэх жилээс худалдан авалттай холбоотой асуудал Сангийн сайдад ирж байгаа учраас үүнийг асууя.

Гуравдугаарт, Зам, тээвэр хөгжлийн сайдаас асууя. Хялганбат- Хангалын автозамын эхлэлийн 10 км гээд 2 тэрбум төгрөг өргөн барьсан байна, нийт өртөг нь 5 тэрбум гээд. Үүнийг би давхардаж байгаа юм болов уу гэж ойлгож байна. Энэ ямар ажил юм бэ? Уулын баяжуулах Эрдэнэт үйлдвэрээс технологийн зам буюу Эрдэнэтээс Хялганат хүртэл автозам тавихаар тендер нь зарлаж байгаа ч юмуу, зарлагдсан гэж ойлгосон. Энэ давхцаад байгаа юм бишүү? Хялганат, Хангал гэдэг чинь дайран өнгөрөх суурингууд шүү дээ. Энэ талаар хариулт авья.

Түүний асуултад Сангийн сайд Б.Жавхлан, Зам, тээвэр хөгжлийн яамны ажилтан хариуллаа.