Даланзадгад-Мандалговь-Улаанбаатар чиглэлийн улсын чанартай авто замын хөдөлгөөний аюулгүй байдал алдагдаж, зам тээврийн ослын тоо нэмэгдэж байгаа учраас УИХ-ын гишүүн Н.Наранбаатар Зам, тээврийн хөгжлийн сайд Л.Халтарт санал хүргүүллээ.

Н.Наранбаатар гишүүн Улаанбаатар - Мандалговь -Даланзадгад чиглэлийн улсын чанартай авто замаар уул уурхайн бүтээн байгуулалтад оролцож байгаа аж ахуйн нэгжүүдийн болон Тавантолгой түлш ХХК-ийн нүүрс тээвэрлэсэн хүнд даацын тээврийн хэрэгслүүд зорчих болсноор авто замын гэмтэл үлэмж ихэссэн. Замын хөдөлгөөний аюулгүйн байдал алдагдсанаар зам тээврийн ослын тоо нэмэгдэж, иргэдийн амьд явах, эрүүл аюулгүй орчинд амьдрах Монгол Улсын Үндсэн хуулиар баталгаажсан эрх нь зөрчигдөж байгаа талаар онцлоод дараах дараах саналыг тусгажээ.

1. Хүнд даацын тээврийн хэрэгслүүд зорчиход тодорхой хязгаарлалтын арга хэмжээ авах
2. Авто замд учруулах хор нөлөөг бууруулах
3. Авто замын арчлалтын ажлуудад төрийн захиргааны төв байгууллагын нэгдсэн хяналтыг сайжруулах