Монгол, БНХАУ-ын хилийн 0 цэгээс Замын-Үүд хүртэлх тээврийг төрийн тусгай чиг үүргийн байгууллагын мэргэжлийн 200 жолооч төлбөргүй тээвэрлэхээр болжээ. 

Энэ талаар ХЗДХ-ийн сайд Х.Нямбаатар: 

- БНХАУ-ын Эрээн хотын Гаалийн хашаанд манайх руу орж ирэх чингэлэг төвлөрч байна. Энэ хашаанаас  БНХАУ-ын “Сино Транс” компани ачаа барааг Монгол, Хятадын хилийн 0 цэг дээр авч ирж өгөх ёстой. Эндээс Монголын 7000 жолооч ачаа барааг татаж авахаар байгаа. Гэхдээ БНХАУ-аас 7000 жолоочийнхоо халдвар хамгааллын дэглэм чандлан сахиулах ёстой. Хэрэв халдвар хамгаалалтыг сахиулж чадвал байнгын тээвэрлэлт хийе гэсэн. Энэ ямар ч боломжгүй учраас Засгийн газар төрийн тусгай чиг үүргийн байгууллагын мэргэжлийн 200 жолоочоор импортын ачаа барааг 0 цэгээс Замын-Үүд боомт руу төлбөргүй зөөлгөхөөр шийдвэрлэсэн. Үүний дараа нөгөө 7000 жолооч Замын-Үүдээс Улаанбаатар хот руу тээвэрлэнэ. Маргааш туршилтын тээврийг эхлүүлнэ. Энэ бол Засгийн газраас тээвэр ложистикийн хүндрэл, инфляцийг бууруулахын тулд хийж буй нэг алхам” гэв.