УИХ-ын дахь Монгол-Беларусийн парламентын бүлгийн дарга Б.Энх-Амгалан Бүгд Найрамдах Беларусь Улсаас Монгол Улсад Суугаа Онц Бөгөөд Бүрэн Эрхт Элчин сайд Горелик Дмитрий Николаевичтай уулзлаа.

Энэ онд Монгол-Беларусийн хооронд дипломат харилцаа тогтоосны 30 жилийн ой тохиож буй юм. Дипломат харилцаа тогтоосны 30 жилийн ойн хүрээнд парламентын бүлгүүд хооронд цахим хурлыг хоёрдугаар улиралд хийхээр талууд тохиролцжээ.

Уулзалтаар талууд хоёр орны хууль тогтоох байгууллагуудын харилцааг идэвхжүүлэх, ойн хүрээнд хоёр талын парламентын бүлэг хооронд хийгдэх ажлууд, цаашдын хамтын ажиллагааны талаар санал солилцлоо.

Б.Энх-Амгалан гишүүн Зам, тээврийн хөгжлийн сайдаар ажиллаж байхдаа Беларусь Улсын Тээвэр, харилцаа холбооны сайд А.Н.Авраменко, Аж үйлдвэрийн сайд П.В.Утюпин нартай хийсэн албан ёсны хэлэлцээ хийж байсан. Тухайн хэлэлцээг бодит ажил болгох үүднээс хамтын ажиллагааны төсөл хөтөлбөрүүдийг хэрэгжүүлэх, зам тээвэр, хөдөө аж ахуй, соёл урлаг, шинжлэх ухааны салбар, худалдаа, эдийн засгийн хамтын ажиллагааг өргөжүүлэх зэрэг ажлыг үргэлжлүүлэх талаар ярилцжээ.

Ази-Европыг холбосон худалдаа эдийн засгийн хамгийн дөт зам тус хоёр улсын газар нутгаар дамжин өнгөрдөгийн хувьд цаашид хөдөө аж ахуй, зам тээвэр, гадаад худалдаа, эдийн засаг, соёлын салбар дахь хамтын ажиллагааг өргөжүүлэх, баруун бүсэд Беларусийн жишиг фермер, ХАА-н машин механизмын бааз байгуулах зэрэг тодорхой, бодитой ажлуудыг хийх нь чухлыг талууд онцолж байлаа.

УИХ-ын гишүүн Б.Энх-Амгалан Элчин сайд Горелик Дмитрий Николаевичтай уулзлаа