Нийгмийн бодлогын байнгын хороо өнөөдөр 2021 оны намрын ээлжит чуулганы хугацаанд хийсэн ажлаа танилцууллаа. УИХ-ын 2021 оны намрын ээлжит чуулганы хугацаанд 12 удаа хуралдаж, 14 хуулийн төсөл, Улсын Их Хурлын тогтоолын 1 төсөл батлуулсан.

НББХ-ын хувьд хамгийн чухал хуулиудын нэг болох Хөдөлмөрийн тухай хуулийн шинэчилсэн найруулгыг УИХ-аар батлуулж чадлаа.
Энэ удаагийн Хөдөлмөрийн тухай хуулийн шинэчилсэн найруулгад хүний эрхийг хангах хэд хэдэн суурь зарчмуудыг суулгаж, үл ялгаварлан гадуурхах, шударга байх, дарамт, хүчирхийлэл, бэлгийн дарамтыг хориглох, нийгмийн түншлэлийг хангах, малчин, гэрийн үйлчлэгч зэрэг хуулийн зохицуулалтгүй байсан хөдөлмөрийн харилцааг зохицуулалттай болгож, цалин хөлсийг тооцон олгох, гэрээсээ ажил эрхлэх, зайнаас ажил эрхлэхийг мөн хуулийн зохицуулалттай болгосон.

Уртын ээлжээр ажиллах ажилтны нэг ээлжид ажил үүрэг гүйцэтгэх хугацааг 14 хоног, амрах хугацааг 14 хоног болгосон нь зарим ажил мэргэжлийн хүмүүсийн хувьд гэр бүлдээ зарцуулах хугацааг нэмэгдүүлэх ач холбогдолтой болсон юм.

Мөн өмнө нь хуулийн хийдэл гардаг байсан дагалдангаар ажиллах, дагалдангаар суралцах, туршилтаар ажиллуулах асуудлыг хуульчилж ажилтны эрхийг хангах тал дээр анхаарсан хууль боллоо.

Товчхон:

• Ажиллах хүчний шилжилт хөдөлгөөний тухай хуулийн шинэчилсэн найруулгыг намрын ээлжит чуулганы хугацаанд батлуулснаар гадаадад ажилд зуучлагч компани зуучлуулагчаас аливаа төлбөр хураамж авахгүй байхаар хуульчилсан.
• Монгол хүний удмын санг хамгаалах, хүн амын өсөлтийг дэмжих Улсын Их Хурлын тогтоолын төслийг батлууллаа.
Ингэснээр айл өрх бүр Угийн бичиг хөтөлж хэвших, цаашлаад удам судраа мэдэх, цус ойртолт, удамшлын өвчлөлөөс сэргийлэх ажлын эхлэлийг цаасан дээр бус бодит амьдралд хэрэгжих ажлын эхлэл болох юм.
• УИХ-аар батлагдсан хуулийн хэрэгжилтийг хянах Байнгын хорооны эрх үүргийн хүрээнд Эрүүл мэндийн салбарын хууль тогтоомжийн биелэлтийг хянан шалгах ажлын хэсэг байгуулагдаж гурван сар гаруйн хугацаанд Өвөрхангай, Сүхбаатар, Төв, Орхон аймаг, сумдын эмнэлэг, нийслэлд гуравдугаар шатлалын эмнэлэг зэрэг бүх шатлалын эмнэлгүүдэд ажилласан.
Шалгалтын дүнд хуулийн мөн чанарыг ойлгож хэрэгжүүлэх, бүрэн хэрэгжүүлэх ажил удаашралтай байгаа нь харагдсан. Тиймээс хуулийн хэрэгжилтийг хангуулж ажиллахыг Засгийн газарт чиглэл болгосон.
• НББХ-оос ойрын хугацаанд Хүүхдийн эрхийн тухай, Хүүхэд хамгааллын тухай, Гэр бүлийн хүчирхийлэлтэй тэмцэх тухай хуулийн хэрэгжилтийг хянан шалгах, холбогдох байгууллагын үйл ажиллагаатай танилцах үүрэг бүхий хяналт шалгалтын ажлын хэсэг байгуулахаар ажиллаж байна.

Энэ хүрээнд хүүхэд хамгааллын үйлчилгээг сайжруулах, хүүхэд хамгааллын төсөв хөрөнгийн зарцуулалтад хяналт тавьж, аудит оруулж ажиллана.

НББХ намрын ээлжит чуулганы хугацаанд 14 хууль батлууллаа