Өнөөдөр /2022.03.11/ Монголын Эрүүл мэндийн ажилтны ҮЭ-ийн холбооноос “Эрүүл мэндийн ажилтны хөдөлмөрлөх эрх ба үйлдвэрчний эвлэл” сэдэвт ҮЭ-ийн хороодын дарга нарын Улсын IV зөвлөгөөнийг Гадаад хэргийн яамны хурлын танхимд зохион байгуулж байна. Энэ үеэр тус зөвлөгөөнд оролцож байгаа 21 аймаг дүүргийн эрүүл мэндийн ажилтнуудын ҮЭ-ийн хороодын дарга идэвхтнүүд салбарын ажилтнуудын цалин хөлс улсын дунджаас хоёр дахин бага байгаа асуудлыг хэлэлцэж УИХ, Засгийн газарт шаардлага хүргүүлэхээ мэдэгдлээ.

Зөвлөгөөний эхэнд МҮЭ-ийн холбооны Ерөнхийлөгч С.Эрдэнэбат, МЭМАҮЭХолбооны дарга Ч.Нарантуяа, нар нээлтийг үг хэлж Эрүүл мэндийн салбарт тулгамдаж байгаа асуудлыг шийдвэрлэх хүрээнд шат дараатай арга хэмжээ авч ажиллахаа илэрхийлэв. Энэ хүрээнд УИХ, Засгийн газарт санал шаардлага хүргүүлж салбарын хөгжлийн асуудлаар ҮЭ үүрэг оролцоогоо улам идэвхжүүлж ажиллана гэв.

Учир нь Эрүүл мэндийн салбарын ажилтнуудын ажлын цагийн менежмент алдагдсан. Хэт урт цагаар ажиллах боловч цалин бага, эмч, сувилагч эмнэлгийн ажилтнуудын ажлын ачаалал өндөр ХАБЭА-н алдагдсан. Нормын хувцас бүрэн хангагддаггүй учраас эмч эмнэлгийн ажилтнууд өөрсдийн мөнгөөр хамгаалах хувцас хэрэгсэл авдаг. Мөн амь нас эрүүл мэндийн эрсдэлийн баталгаа байхгүй, даатгалгүй нөхцөлд ажиллаж, амжил үүргээ гүйцэтгэх явцдаа өвдсөн, нас барсан ажилтнуудад хуулийн дагуу олгогдох таван жилийн цалинтай тэнцэх тэтгэмж олгогдох эх үүсвэр тодорхойгүй байгаа зэрэг олон асуудлыг хөндөж байсан юм.

Энэхүү зөвлөгөөнд ҮЭ-ийн хороодын дарга, идэвхтэн сонгуультан 100 орчим хүн оролцож байгаа бөгөөд “Эрүүл мэндийн салбарын бодлого, эрх зүйн орчны шинэчлэл”, “МҮЭ-ийн холбооны үйл ажиллагаа, хөгжлийн зорилт”, эрүүл мэндийн салбарын цалин хөлс, гүйцэтгэлийн санхүүжилтийг өнөөгийн байдал, Цаашдын чиг хандлага”, “Эрүүл мэндийн салбарын ажилтнуудын хөдөлмөрлөх эрхийн өнөөгийн байдал, үүрэг, хөгжил, багийн ажиллагааны стратеги” зэрэг олон асуудлаар итгэл мэдээлэл сонсож, цаашдын асуудлаа тодорхойлох аж.