2022.03.24

Б.Бат-эрдэнэ: Төрийн албан хаагчдын цалин хангамжийг тогтооход мониторинг үнэлгээ хийх хэрэгтэй

УИХ-ын чуулганы /2022.03.24/-ны хуралдаанаар “Шүүх шинжилгээний тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд”-ийг хэлэлцлээ.

Хуулийн төсөлтэй холбогдуулан УИХ-ын гишүүд асуулт асууж, санал хэллээ.

УИХ-ын гишүүн Б.Бат-эрдэнэ:

Шүүхийн шинжилгээний байгууллагын ажиллагсадын нийгмийн баталгаа, хангамжтай холбоотой асуудлыг шийдэж чадаагүй гэсэн ойлголт төрлөө. Өнөөдөр Монголд хамгийн өндөр цалин авч байгаа шүүхийн байгууллагыг шүүхийн ерөнхий зөвлөлийн харьяа руу шилжүүлэх хувилбар байгаа гэсэн санааг ярьж байна. Үүнтэй уялдуулаад Монголын төрийн нийт албан хаагчид, салбаруудын цалин хангамж хоорондоо ялгамжгүй байдлыг тогтооход мониторинг үнэлгээ хийж, тодорхой хэмжээнд цэгцлэх хэрэгтэй.

Ер нь цалин хөлс гэдэг бол бүтээмж, ур чадвартайгаа уялдах ёстой. Улсын эдийн засгийн 80%-ийг хувийн хэвшил нуруундаа үүрч байна гэж ярьж байгаа боловч төрийн албан хаагчдын цалин, нийгмийн баталгаатай холбоотой хэт өрсөлдсөн уралдааны хөлд  хувийн хэвшил чирэгдээд унах байдалтай байна.

Их хурлаас Хөгжлийн банкны талаар шалгалт хийх ажлын хэсэгт бид ажиллаж байгаа. Найдваргүй болсон 61 байгууллага, төслүүдийн бодит байдлыг газар дээр нь очиж үзэх, шалгалт хийх, үнэлгээ хийх зэрэг тулгамдаж буй гол асуудал энэ хуультай холбоотой байгаа. Энэ хуулиар зохицуулалтын нэлээн сайн зүйлүүд орж ирж байна гэж ойлгож байгаа. Мөн байгаль орчинд учруулсан хохирлыг нөхөн төлүүлэхтэй холбоотой, өмнө яригдсан сэтгэл санааны хохирлыг нөхөн төлүүлэхээс эхлээд шинэлэг зохицуулалтууд орж ирж байгаа энэхүү хуулийн төслийг бол дэмжиж байна.