2022.04.14

Завхан аймагт малчдын зөвлөгөөн зохион байгуулагдлаа

Энэ жилийн зөвлөгөөнийг аймгийн Засаг даргын Тамгын газар, НҮБ-ын хамтарсан “Малчдын нийгмийн хамгааллыг сайжруулж цочролд бэлэн байх чадавхыг нэмэгдүүлэх нь” төслийн дэмжлэгтэйгээр зохион байгуулж байна.

Зөвлөгөөнд Завхан аймгийн 24 сумын 112 багийн 200 гаруй малчдын төлөөлөл оролцож байгаагаас 30 гаруй хувь нь эмэгтэй малчдын төлөөлөл оролцов.

Зөвлөгөөн хоёр өдөр үргэлжлэх бөгөөд өнөөдөр /2022.04.14/ “Завхан аймгийн мал аж ахуйн салбарт баримталж буй бодлого шийдвэр, түүний хэрэгжилт, тулгамдаж буй асуудал”, “Мал амьтны эрүүл мэндийн талаар төрөөс баримталж байгаа бодлого", “Малчдын эрүүл мэндийн эрт илрүүлэг, урьдчилан сэргийлэх үзлэг”, “Мал хулгайлах гэмт хэргээс урьдчилан сэргийлэх” зэрэг сэдвүүдээр мэдээлэл өгч, туршлага солилцлоо.

Маргааш буюу зөвлөгөөний хоёр дахь өдөр НҮБ-ын хамтарсан “Малчдын нийгмийн хамгааллыг сайжруулж цочролд бэлэн байх чадавхыг нэмэгдүүлэх нь” төслийн хэрэгжилт үр дүнгийн талаар НҮБ-ын суурин зохицуулагч Тапан Мишра болон холбогдох албаны хүмүүс мэдээлэл хийнэ.

Мөн УИХ-ын гишүүн Б.Баярсайханы урилгаар доктор Ч.Нилбаатар "Төөнөж тасдах арга" ашиглан малын ашиг шимийг нэмэгдүүлэх технологийн талаар малчдад сургалт явуулж, туршлага солилцлоо.

"Хурга, бярууг цахилгаан соронзон долгионы багаж ашиглан зайнаас төөнөх аргаар хөнгөлөх шинэ технологи"-ийн патентийг эзэмшигч Ч.Нилбаатар доктор Завхан аймгийн 24 сумын Иргэдийн хурлын дарга, Засаг дарга нарт илтгэл тавьсан.

Малын төөнөх аргаар засч махны гарцыг нэмэгдүүлж, эдийн засгийн эргэлтэд хурдан оруулах нь бэлчээр талхлалтаас гадна малчин түмний хөдөлмөрийг асар хөнгөвчилж болох үр дүнтэй технологи юм. Олон аймаг, сумдад туршин хэрэгжүүлж байгаа энэ аргыг Завхан аймгийн 24 суманд нэвтрүүлэхийг зорьж ажиллаж байна. Чуулганд оролцсон малчид Ч.Нилбаатар доктороос олон олон асуулт асууж, дэмжих хамтран ажиллахаа илэрхийллээ.

УИХ-ын гишүүн Б.Баярсайхан “Малч ухаан, Монгол ахуйг шинжлэх ухаантай хослуулан энгийн бөгөөд шооч байдлаар сонирхолтой ярьж чаддаг жинхэнэ бодит практик, эрдэм мэдлэг хосолсон эрхэм хүндэт Ч.Нилбаатар доктордоо Завхан нутгийг минь зорин ирж хэрэгтэй мэдээлэл түгээсэнд чин сэтгэлээсээ талархал илэрхийлье” хэмээлээ.