2022.04.27

Ахмадын улсын аварга шалгаруулах шатрын тэмцээн боллоо

Монгол улсын гавьяат дасгалжуулагч Ч.Лхагваагийн нэрэмжит “Ахмадын улсын аварга шалгаруулах шатрын тэмцээн” Дундговь аймагт 4 дүгээр сарын 23, 24-ны өдрүүдэд зохион байгуулагдлаа. Энэ үеэр УИХ-ын гишүүн Г.Мөнхцэцэг тойрогтоо ажиллаж байсан бөгөөд тэмцээнд оролцсон тамирчдад амжилт хүссэн юм.

Тэмцээнд +50 эрэгтэй, эмэгтэй, +65 эрэгтэй, эмэгтэй насны ангилалд 12 аймаг, нийслэлийн 9 дүүргийн 100 гаруй шатарчин оролцлоо. Ахмадын улсын аварга шалгаруулах шатрын тэмцээн энэ жил анх удаа говьд зохион байгуулагдаж байгаа төдийгүй Монгол Улсын 6 удаагийн аварга, 6 алт, 6 мөнгө, 3 хүрэл медальт, шигшээ тэмцээнд 25 удаа, шатрын олимпиадад 6 удаа оролцсон гавьяат багш Ч.Лхагваагийн нэрэмжит болж буйгаараа онцлог байлаа.

Дундговь аймгийн Баянжаргалан сумын харьяат Ч.Лхагваа багш маань эдүгээ төрөлх нутагтаа амьдарч, олон сайхан шавь нараа тив дэлхийн тэмцээнд сойж бахдам амжилтыг төрүүлсээр байгаа билээ.