Дарханы замын Ажлын хэсгийн ахлагч Г.Дамдинням  өнөөдөр /2022.04.26/ ЗТХЯ, Тээврийн цагдаагийн албаны удирдлагуудтай уулзаж санал солилцлоо.

Үүнд:

Орон нутгийн иргэдийн хяналт

• Түр замын асуудал
• Тоос шороо
• Иргэдийн хөдөлгөөний аюулгүй байдал
• Тээврийн цагдаагийн алба, ЗТХЯ-ны ажлын уялдаа холбоо зэрэг асуудлуудын хүрээнд ярилцлаа.

Өмнө нь тус замын хэмжээнд 30 хүнтэй цагдаагийн баг ажиллаж байсан ч КОВИД-ын хөл хорионы үед хөдөлгөөн буурч төсөвгүй гэх шалтгаанаар болиулсан байна. Хөл хорио цуцалсны дараа осол аваар 38%-иар өсөж эхэлжээ.

Иймд Тээврийн цагдаагийн алба ЗТХЯ хамтран хөдөлгөөний аюулгүй байдлыг хангах чиглэлээр зарим хэсгүүдэд хурд сааруулагч байрлуулах, зам дээр ажиллах цагдаа нарын тоог эрс нэмэгдүүлэх ажлыг төсөл хэлбэрээр боловсруулан зардал, шийдлийн төсөл танилцуулах чиглэл өгөв. Мөн тус албанаас өгсөн мэдээллээр Дарханы замын бүтээн байгуулалтын ажил эхэлснээс хойш нийт 300 орчим зам тээврийн осол бүртгэгдсэнээс 100 гаруй хүн бэртэж гэмтэж, 30 хүний амь үрэгдсэн байна. 

Одоо замын ажил дуусаж, улсад хүлээлгэж өгөх хугацаанд дахиад нэг ч гэсэн иргэн эрүүл мэнд, амь нас, эд хөрөнгөөрөө хохироохгүй байх шаардлагатай байна. Иймд ЗТХЯ-нд Түр замын нөхцлийг сайжруулах тал дээр онцгой анхаарч засвартай байгаа болон суурин газруудын ойролцоох хэсгүүдийг тогтмол усалгаатай, хусаж янзалж байх төлөвлөлтыг гарган УИХ-ын Ажлын хэсэгт ирүүлж Иргэдийн хяналтаар баталгаажуулж мэдээлж байх үүрэг чиглэл өглөө. Эдгээр ажлын явц, үр дүнг удахгүй мэдээлэх болно.