"Улаанбаатар их дуулга" тэмцээний бэлтгэл ажил явагдаж байна
2022.05.03

"Улаанбаатар их дуулга" тэмцээний бэлтгэл ажил явагдаж байна

Жудо бөхийн "Улаанбаатар их дуулга" тэмцээнийг Улаанбаатар хотод 2022 оны 06 дугаар сарын 24-26-ны өдрүүдэд зохион байгуулахаар бэлтгэл ажлыг хангаж байна.

Тус тэмцээнийг зохион байгуулснаар спортоор дамжуулан эх орноо дэлхийд таниулан сурталчлах, хүүхэд залуусын спортоор хичээллэх сонирхлыг нэмэгдүүлэх, Дэлхийн аварга шалгаруулах тэмцээнүүдийг эх орондоо зохион байгуулах эрх авах зэрэг томоохон ач холбогдолтой.

Манай улс 2009-2011 оны хооронд “Чингис Хаан Дэлхийн цом”, 2012-2016 онуудад “Чингис Хаан Гран При” тэмцээнийг зохион байгуулж байсан туршлагатай бөгөөд энэ удаад Гранд Слам буюу Их дуулга тэмцээнийг эх орондоо 4 жилийн хугацаанд зохион байгуулахаар болсон.

Гранд Слам тэмцээн нь нэр хүндээрээ ДАШТ болон “World Masters” тэмцээнүүдийн дараа эрэмбэлэгдэх томоохон тэмцээн бөгөөд олимпын эрхийн оноо олгох чухал ач холбогдолтой тэмцээн билээ. Тус тэмцээнд 70 орны 800 орчим тамирчин, 200-аад албаны хүмүүс, 1000 гаруй фанатууд оролцож, дэлхийн 200 гаруй улс орнуудад шууд дамжуулалтаар цацагдах юм.