![Б.Баярсайхан: Хүүхдийн эрхийг хамгаалах зардлыг улсын төсөвт суулгаж, эцэг эхийн хариуцлагыг сайжруулах хэрэгтэй](https://vip76.mn/media/news/original/2022/05/27/9ec4ff3a0dbc11a413985ecdef7b9b54.jpg)
2022.05.27
Б.Баярсайхан: Хүүхдийн эрхийг хамгаалах зардлыг улсын төсөвт суулгаж, эцэг эхийн хариуцлагыг сайжруулах хэрэгтэй
УИХ-ын чуулганы /2022,05,27/-ны өдрийн хуралдаан дээр УИХ-ын гишүүн Б.Баярсайхан хүүхдийн эрх, хөгжил, хамгааллын талаар үг хэллээ.
УИХ-ын гишүүн Б.Баярсайхан:
МУ-ын 2023 оны Төсвийн төсөөлөл хэлэлцэж байна. Энэ төсөөлөлд хүүхэдтэй холбоотой зардал хангалттай тавиагүй байна. Мөн Хүүхдийн эрхийг хамгаалах өдөр болох гэж байна. Ийм учраас УИХ-ын чуулганы хуралдаан дээр хүүхдийн эрх, хөгжил, хамгааллын талаар үг хэлэх хүсэлт тавьсан юм.Өнөөдөр УИХ-ын гишүүний хувьд, ард түмний өмнө хүлээсэн үүрэг, хариуцлагын хүрээнд Төрийн ордонд хүүхдэд ээлтэй Монгол, хүүхдийн өмнө үүрэг хүлээгчдийн үндэсний чуулганыг зохион байгуулж байна.
Энэ чуулганд төрийн болон төрийн бус байгууллагууд,ОУБ-ын төлөөлөл, эцэг, эхчүүд, хүүхдүүд оролцож байна.Үндэсний чуулганыг зохион байгуулахад дэмжлэг үзүүлсэн Ерөнхийлөгчийн тамгыг газар, Монгол Улсын Ерөнхийлөгч Л.Оюун-Эрдэнийн ахалдаг Хүүхдийн төлөө үндэсний зөвлөл, НҮБ, ДЗОУБ болон бусад байгууллагын төлөөлөлд талархал илэрхийлж байна. Мөн УИХ-ын чуулганы хуралдаанд Хүүхдийн эрхийн талаар үг хэлэх боломж олгосон УИХ-ын дарга Г.Занданшатар танд талархал илэрхийлье.
Монгол Улсын үнэт баялаг бол Монгол хүн, юутай ч зүйрлэшгүй үнэт эрдэнэ болсон үр хүүхдүүд минь юм. Монгол Улсыг хүмүүнлэг нийгэм рүү хэдхэн жилийн дараа хөтлөн явах үр хүүхдүүдийн маань насанд хүрэгчдийн хайхрамжгүй байдлаас болж амьд явах, хайрлуулах, сурах, боловсрох, амар тайван явах, жам ёсны эрх хөсөр хаягдаж байгаа асуудал сэтгэл түгшээх хэмжээнд нэгэнт хүрчээ.
Хүүхэд хөгжил, хамгааллын асуудал гэдэг бол ганцхан хүчирхийлэлд өртсөн хүүхдүүдийн асуудал биш, хүүхдийг эхийн хэвлийд байхаас нь хайрлан хамгаалах, эрүүл саруул төрүүлэх, өсгөх, зөв зан чанартай иргэн болгон хүмүүжүүлэх,шим тэжээлтэй хоол, ундаар хангах, аюулгүй орчинд сургах, амьдрах нөхцөлийг бүрдүүлэх, хүүхдийн хувцас хэрэгсэл, эм тариа зэрэг хүүхдэд чиглэсэн бүх бараа үйлчилгээ нь ОУ-ын стандартыг хангасан байж, улмаар үүнийгээ хатуу чанд мөрдөхийг аль ч түвшинд ажил болгон хэрэгжүүлэх нь чухал асуудал болоод байна.
Монгол Улс НҮБ-ын Хүүхдийн эрхийн тухай конвенцид нэгдэн орж, хүүхдийг нийгмийн бүхий л хүрээнд онцгойлон анхаарахаар амласан, үүрэг хүлээсэн улс орон.Хүүхдийн эрх, ашиг сонирхол аливаа ашиг сонирхолоос давуу, дээд түвшинд үнэлэгдэж, хамгаалагдах ёстой, ашиг сонирхол эрх гэдэгт манай улс нэгдсэн. Мөн Монгол Улсын Үндсэн хуульд гэр бүл, хүүхэд, нялхсын эрхийг төр хамгаална гэж заасан.
Гэтэл манай улсын сум бүрд мал хариуцсан 3 хүн байдаг бол хүүхэд хамгаалсан ганц ч мэргэжилтэн байхгүй байна. Иймд 2023 оны улсын төсөвт сум, хороо, баг бүрд гэр бүлийн асуудал хариуцсан ажилтантай байх төсвийг УИХ, Засгийн газар, аймаг, нийслэлийн засаг дарга нараас хүсэж байна.
![](https://vip76.mn/media/user/60x60/user10887.jpg)
Сэтгүүлч
Сэтгүүлч Ц.Соёлмаа soyolmaa@vip76.mn