2022.05.27

Б.Энхбаяр: Эм, эмнэлгийн бараа бүтээгдэхүүн импортлогч компаниудад хууль бус гүйцэтгэх ажиллагаа явуулсан уу

УИХ-ын чуулганы /2022,05,27/-ны өдрийн ээлжит хуралдаанаар Зөвшөөрлийн тухай хуулийн нэгтгэсэн төсөл болон хамт өргөн мэдүүлсэн хуулийн төслүүдийн анхны хэлэлцүүлгийг  хэлэлцлээ.

Хэлэлцэж буй асуудалтай холбогдуулан гишүүд асуулт асуулаа.

УИХ-ын гишүүн Б.Энхбаяр:

Зам түүний ойролцоо болон нийтийн эзэмшлийн гудамж талбайд худалдаа, үйлчилгээ эрхлэх зөвшөөрлийг тухайн аймаг, сум, дүүрэг, нийслэлийн засаг дарга олгоно гэж байна. Энэ худалдаа, үйлчилгээгээ ялгах уу, ялгахгүй юу?

Гадаадын төрийн өмчит хуулийн этгээд Монгол улсын хуулийн этгээдийн нийт гаргасан хувьцааны 33 буюу түүнээс дээш хувийг гадаадын төрийн өмчит хуулийн этгээд эзэмших, 5.2-т гадаадын төрийн өмчит хуулийн этгээд уул уурхай, банк санхүү эсхүл хэвлэл мэдээлэл харилцаа холбооны салбарт үйл ажиллагаа эрхлэх зөвшөөрлийг эдийн засаг, хөгжлийн асуудал хариуцсан төрийн захиргааны төв байгууллага олгохоор байна. Энэ зөвшөөрлийн хуульд байсан харилцаа юу эсвэл шинээр олгох уу гэдгийг тодруулъя.

Мөн мансууруулах бодис бүхий ургамал ашиглаж эм бэлтгэн найруулахыг “Эрүүл мэндийн яам” зөвшөөрч байгаа юм. Харин 13-ын 17-т мансууруулах сэтгэцэд нөлөөлөх эм, эмийн бодис, угтвар бодис болон эм үйлдвэрлэх, импортлох, экспортлох ханган нийлүүлэх, худалдах зөвшөөрлийг эмийн асуудал эрхэлсэн төрийн захиргааны байгууллага олгоно. Би өмнө хэлж байсан. Эмийн бүлэглэл гар хөлөө энэ байгууллагад бүтэн оруулсан. Европ болон ОХУ-д эмийн санд худалдаалагддаг мэдээ алдуулах, өвчин намдаах чиглэлээр зөвшөөрөгдсөн эмийг манайд хар тамхи гэж үздэг. Монголын эмийн компаниуд өндөр үнэтэй, чанар муутай эмээ худалдан борлуулахын тулд зориуд өрсөлдөгч эмийг мансууруулах бодисын жагсаалтад оруулдаг. Ийм сүлжээ бий. Энэ асуудалд ямар дүгнэлт хийж байна вэ? Энэ дээр хяналттай байх хэрэгтэй.

Хувийн хамгаалалтын үйл ажиллагаа эрхлэхийг тухайн аймаг, нийслэлийн цагдаагийн газар олгохоор 11-ийн 12-т заасан байна. Үүнийг “Хууль зүйн яам” олгомоор байгаа юм.

Түүний асуултад ажлын хэсгийн гишүүд хариуллаа.   

УИХ-ын гишүүн Б.Энхбаяр: Газар, байгалийн баялаг, лицензтэй холбоотой зохицуулалтыг анхаарах шаардлагатай 

Хуульд өөрөөр заагаагүй бол зөвшөөрөл түүний баталгаажуулсан зөвшөөрлийн баримт бичгийг бусдад худалдах, бэлэглэх, барьцаалах, бусад хэлбэрээр шилжүүлэхийг хориглоно гэсэн заалт байна. Энэ зарчмын хувьд зөв. Гэхдээ гүйцээн боловсруулах гэсэн чиглэл дотор газрыг зөвшөөрөөд ашигт малтмалын лиценз яваад байгаа. Өөрөөр хэлбэл байгалийн баялаг гэдгээр. Ашигт малтмалын лиценз болон газрыг барьцаалж, бусдад бэлэглэж, зарим нь худалдаж байгаа.

Газар эзэмших эрхийн гэрчилгээг шилжүүлэхэд татвар авдаг. Гэтэл газрын хуулиар эзэмших эрхийг худалдаж болохгүй гэдэг. Ийм ойлгомжгүй байдлыг зохицуулах шаардлагатай. Хуульд өөрөөр заагаагүй бол гэдгийн цаана газрын хууль, бусад барьцааны хууль, хөдлөх эд хөрөнгө, үл хөдлөх эд хөрөнгийн бүртгэлийн хуулиудаа нилээн чамбайруулж, цааш нь харахгүй бол нөгөө хуулиуд дээрээ хориглочихсон байвал асуудал үүснэ. Газар, байгалийн баялаг, лицензтэй холбоотой зохицуулалтыг эцсийн хэлэлцүүлэг дээр анхаарах шаардлагатай.