УИХ-ын чуулганы /2022.06.09/-ний өдрийн хуралдаанаар Төрийн болон орон нутгийн өмчийн хөрөнгөөр бараа ажил, үйлчилгээ худалдан авах тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийн эцсийн хэлэлцүүлгийг хийлээ.

Хэлэлцэж буй асуудалтай холбогдуулан УИХ-ын гишүүд асуулт асуулаа.

УИХ-ын гишүүн Г.Дамдинням: 

Тендерийн хуулин дээр хэт бага үнийн саналаар орж ирсэн компаниудыг яаж зохицуулах вэ? Хэт бага үнийн саналаар орж ирсэн айл Азийн хөгжлийн банкны 2,4-дүгээр багц дээр орж ирснээс болж хэт бага үнийн санал биш, хамгийн үнэтэй хэрэгжиж буй хоёр хэсэг болж хувирах гээд байна. Энэ бол олон улсын төсөл. Гэхдээ худалдан авах ажиллагааны хуулин дээр зохицуулалтыг сайн хийж өгөхгүй бат хэт бага үнээр хийж чадахгүй гүрийж сууж байгаад төсөв нэмүүлдэг, хамгийн үнэтэйгээр хийж дуусдаг буруу жишиг рүү яваад байна. Энийг яаж зохицуулж байгаа вэ?

Мөн тендерийн гүйцэтгэлийн баталгааг бууруулах нь зөв үү? Тухайн үед 2,4-дүгээр багцыг авсан айлын тендерийн баталгааг 10 хувиар тавиад байхад бүтэлгүй байдал руу орж байгаа юм. Амжилттай яваад дууссан Азийн хөгжлийн банкны 1, 3, 5-дугаар багцын ажлын чанарын баталгаа нь 1 жил, харин улсын комисс хүлээж аваагүй байгаа замын чанарын баталгааны хугацаа дуусчихсан. Энийг хуулин дээрээ яаж зохицуулсан юм. Мөн үнийн өсөлтийн ажил бүтээн байгуулалтын ажлыг их гацаадаг. Үнийн өсөлтийг хуулиндаа яаж зохицуулсан бэ.