УИХ-ын чуулганы \2022.07.01\ өдрийн нэгдсэн хуралдаанаар Согтууруулах ундааны эргэлтэд хяналт тавих, архидан согтуурахтай тэмцэх тухай хуулийн төсөл болон хамт өргөн мэдүүлсэн хуулийн төслүүдийн анхны хэлэлцүүлгийг явууллаа.

Хэлэлцэж буй асуудалтай холбогдуулан гишүүд асуулт асуулаа.

УИХ-ын гишүүн Ц.Идэрбат:

Согтууруулах ундааны хуулинд 12 удаа өөрчлөлт оруулсан боловч эрүүгийн нөхцөл байдал, архинаас үүдэлтэй сөрөг үзэгдлүүд огт буураагүй, илүү нэмэгдсэн байна. Иргэдээс авсан судалгаанд 22 хувь нь хуулийг чангатгах хэрэгтэй гэсэн санал өгчээ. Энэ удаагийн хуулинд архитай холбоотой ямар зүйл, заалтууд чангарч орж ирж байгаа вэ. Жишээ нь өнөөдөр согтуу жолооч үнэмлэхтэй байхад 450 мянган төгрөгөөр торгуулаад явж байна.

Дэлхийн улс орнууд татвар, зөвшөөрөл, хориглох, хязгаарлах зүйл заалт, зохицуулалтаар шийдэх гэж оролддог. Манайх мөн зөвшөөрөл, хориглох, хязгаарлах зүйл заалтуудыг хэрэглээд явж байгаа. Гагцхүү олон жилийн хугацаанд шинэчилсэн найруулга, нэмэлт өөрчлөлт оруулахдаа татварын асуудлыг огт хөндөж байгаагүй. Энэ удаа зоригтой нэмж байгаад баяртай байгаа. Илүү нэммээр байгаа юм. Татварын асуудлыг дорвитойхон нэмж өгвөл архидалт хамаагүй багасна.

Түүний асуултад ажлын хэсгийн гишүүд хариуллаа.