УИХ-ын чуулганы өнөөдрийн \2022.07.06\ нэгдсэн хуралдаанаар “Монгол Улс дахь хүний эрх, эрх чөлөөний байдлын талаарх 21 дэх илтгэлийг хэлэлцсэнтэй холбогдуулан авах арга хэмжээний тухай” Улсын Их Хурлын тогтоолын төслийг хэлэлцлээ. 

УИХ-ын гишүүн Б.Баярсайхан:

Хүүхдийн эрхийн тухай, хүүхэд хамгааллын тухай хуулийн хэрэгжилтийг хянан шалгах, хүүхдийн эрхийг хамгаалах чиг үүрэг бүхий байгууллагын үйл ажиллагаатай танилцах ажлын хэсэг УИХ-ын Нийгмийн бодлогын байнгын хорооноос гарч миний бие энэ ажлын хэсгийг ахалж ажиллаж байгаа. Ажлын хэсэг өчигдөр ШШГЕГ-ын харъяа сургалт, хүмүүжлийн тусгай байгууллагад очиж ажилласан. 2017 онд Зайсанд байсан хүүхдийн хорих төвийг Баянзүрх дүүргийн “Хонхор” гэж нэрлэх газар шилжүүлсэн. Хүний эрхийн үндэсний комиссынхон энэ хорих анги дээр очиж ажиллаж үзсэн үү?

Энд хэдийгээр гэмт хэрэг үйлдээд хүмүүжиж байгаа боловч шийтгэл дээрээ давхар шийтгүүлж байгаа мэт орчин нөхцөлд хүүхдүүд амьдарч байна. Нэг давхар модон "тагз" гэж нэрлэгддэг аль, аль талаасаа 3,4 хуруу цуурчихсан, хэзээ мөдгүй дээвэр нь нурах гэж байгаа ийм нөхцөлд байдалд хүүхдүүд хүмүүжиж байна. Тэнд ЕБ-ын 110-дугаар сургууль гэж бий. Энэ сургуульд багш нар дутагдалтай байна. Өнөөдөр нэг удаа алдсан ч гэсэн насанд хүрээгүй хүүхдүүд маань алдааныхаа хариуцлагыг хүлээгээд, хорих ангид хүмүүжиж, сурч байгаа. Гэхдээ ийм нөхцөл байдалд хүүхдүүдийг амьдруулж, хэцүү нөхцөл байдалд сургамааргүй байна. Тиймээс ХЭҮК, БШУ-ны сайд Л.Энх-Амгалан, ХНХЯ-ны сайд Э.Ариунзаяа,  Хууль зүйн сайд Х.Нямбаатар мөн Гэр бүл, хүүхэд залуучуудын хөгжлийн газрын дарга Г.Батдорж нарыг энэ хорих ангийн нөхцөл байдалтай газар дээр нь очиж, хүүхдүүдийн эрх ямар хэмжээнд зөрчигдөж байгаатай танилцаж нэн яаралтай шаардлагатай арга хэмжээг аваасай гэж хүсэж байна.