Шинэ оны өмнө баталсан Шинэ сэргэлтийн бодлого нь боомтын сэргэлт, эрчим хүчний сэргэлт, аж үйлдвэрийн сэргэлт, хот, хөдөөгийн сэргэлт, ногоон хөгжлийн сэргэлт, төрийн бүтээмжийн сэргэлт гэсэн зургаан багц асуудлаас бүрдэж байна.

Уг бодлогыг амжилттай хэрэгжүүлснээр боомтын хүчин чадал гурав дахин нэмэгдэж, экспортлох бүтээгдэхүүний хэмжээ хоёр дахин, эрчим хүчний чадал 2.5 дахин нэмэгдэж, хөгжлийн том төслүүд бодитой хэрэгжих суурь нөхцөл бүрдэнэ. Үүний үр дүнд 2025 он гэхэд 285 мянган ажлын байр шинээр нэмэгдэж, Улаанбаатарыг зорьсон их нүүдэл багасч, хөдөө орон нутагт өндөр цалинтай ажлын байр олноор бий болно. “Шинэ сэргэлтийн бодлого”-ыг хэрэгжүүлснээр дотоодын нийт бүтээгдэхүүн буюу эдийн засгийн хэмжээ хоёр дахин томорно.

Монгол Улсын Ерөнхий сайд Л.Оюун-Эрдэнэ

Шинэ сэргэлтийн бодлогын хүрээнд Бүсчилсэн хөгжлийн үзэл баримтлалыг эдийн засгийн томоохон төслүүдтэй уялдуулан "Хөдөөгийн хөгжлийг" дараах байдлаар хангана.

Төв аймгийг нийслэл хоттой уялдуулан хөгжүүлэх,
Хэнтий, Дорнод, Сүхбаатар аймгийг Дорнод Монголын эдийн засгийн тэнхлэг, үйлдвэрлэл, аялал жуулчлал, ногоон хөгжлийн бүс,
Говьсүмбэр, Дорноговь, Дундговь, Өмнөговь аймгийг хариуцлагатай уул уурхай, өндөр технологид суурилсан аж үйлдвэрийн бүс,
Говь-Алтай, Баянхонгор, Өвөрхангай аймгийг байгалийн нөөц, аялал жуулчлал, ногоон хөгжлийн бүс,
Ховд, Баян-Өлгий, Увс аймгийг сэргээгдэх эрчим хүч болон өвлийн аялал жуулчлалын бүс,
Сэлэнгэ, Дархан, Орхон, Булган, Архангай, Хөвсгөл, Завхан аймгийг эрчимжсэн хөдөө аж ахуй, боловсруулах үйлдвэрийн бүс болгон хөгжүүлэх юм.

Монгол Улсын Их Хурлын гишүүн Ж.Бат-Эрдэнэ

Шинэ сэргэлтийн бодлого хэрэгжиж, улсын хөгжил урагшлах ёстой. Үүний нэг нь иргэний агаарын тээврийн либералчлал юм. Ингэснээр өрсөлдөөнийг бий болгож, агаарын тээврийн хүртээмж, чанар, үйлчилгээ сайжирч, үнэ ханш буурах давуу талтай. Мөн ачаа тээвэртэй холбоотой асуудлыг шийдэх ёстой. Үүнийг хийхэд ААН-ийг оролцуулах, хөрөнгө оруулалт татах, тодорхой хэмжээний дэмжлэг үзүүлэх шаардлагатай байна. Мэдээж энэ өөрчлөлтийг хийснээр улсын эдийн засагт эерэг нөлөө үзүүлж, хөгжил урагшлах нэг алхам болно.

Харин “Шинэ сэргэлтийн бодлого” хэрэгжсэнээр эдийн засгийн жилийн дундаж өсөлт 6 хувь, нэг хүнд ногдох үйлдвэрлэл 3 дахин өсөж, ажиллах хүчний оролцооны түвшин 65 хувьд хүрнэ. Дундаж ба түүнээс дээш давхаргын иргэдийн эзлэх хувийг 13 хувиар өснө гэж тооцоолжээ.

Энэ бодлогыг хэрэгжүүлэхэд эхний ээлжинд 57 их наяд, бүрэн шийдвэрлэхэд нийт 100-120 орчим их наяд төгрөг шаардлагатай. “Шинэ сэргэлтийн бодлого”-ын хүрээнд Засгийн газраас тухайн аймгийн эдийн засгийг тэлэх, ажлын байрыг дэмжих төслүүдэд иргэдээс санал авч, ажил хэрэг болгохоор ажиллаж байна.

Тухайлбал Баян-Өлгий аймгийн иргэдийн хүсэлтэд тулгуурлан Ногооннуур сумын нутагт орших “Асгат”-ын мөнгөний ордыг эдийн засгийн эргэлтэд оруулах асуудлыг Засгийн газрын хуралдаанд танилцуулан хэлэлцүүлэхийг үүрэг болгосон юм.

Монгол Улсын Их Хурлын гишүүн Т.Аубакир

Баян-Өлгий аймагт байдаг Асгатын мөнгөний ордыг эдийн засгийн эргэлтэд оруулах ажлын хэсгийг миний бие ахалж байна. Энэ ордын лиценз Эрдэнэс Монгол компанид 100 хувь байдаг. Цагаан мөнгө, зэс, хүдрийн орд, хөрөнгө оруулалтын асуудал шийдэгдсэн, удахгүй нөөц нэмэгдүүлэх хайгуул, ашиглалтын баяжуулах үйлдвэрийн сонгон шалгаруулалт болно. Асгатын орд эдийн засгийн эргэлтэд орсноор Баян-Өлгийд тулгамдаж буй ажилгүйдэл, ядуурал буурахаас гадна аймгийн төсөвт тодорхой хэмжээний мөнгө төвлөрөх юм.

Улаанбаатарыг зорьсон их нүүдэл багасаж, шинээр 285 мянган ажлын байр нэмэгдэнэ