Сангийн сайд Б.Жавхлан: Хөтөлийн 329 тэрбумын зээлийг хаанаас яаж төлөх нь тодорхойгүй байна
2022.07.21

Сангийн сайд Б.Жавхлан: Хөтөлийн 329 тэрбумын зээлийг хаанаас яаж төлөх нь тодорхойгүй байна

Хөгжлийн банкны чанаргүй зээлийн талаар Сангийн сайд Б.Жавхлан мэдээлэл өглөө.

 Тэрбээр "Засгийн газар энэ хагас жилдээ Хөгжлийн банкны 300 гаруй тэрбумын чанаргүй зээлийг төлүүлэх төлөвлөгөөтэй ажилласан. Тавдугаар сарын 30-ны байдлаар бэлэн мөнгөөр 481 тэрбум төгрөгийн муу зээл төлөгдлөө. Энэ жилдээ багтаад нэг их наядын зээл төлүүлчих төлөвлөгөөтэй байна. Нөхцөл байдал амаргүй. Чанаргүй зээлүүдийн цаана бүтэлгүйтсэн төслүүд байдаг. Тэр бүгдийг төлүүлэхээр таван чиглэлээр ажиллаж байна.

Барьцаа хөрөнгөтэй шүүхийн шийдвэрээр ажиллаж байна. Өмчийн эзэмшилд нь халдах, бүтцийн өөрчлөлт хийх байдлаар, мөн хослуулж ажиллаж байна. Түүнчлэн ямар ч барьцаа хөрөнгийн шаардлага хангахгүй болсон, эргэн төлөгдөх эх үүсвэр тодорхойгүй болсон гурван зээл байна.

Хөтөлийн 329 тэрбумын зээлийг хаанаас яаж төлөх нь тодорхойгүй шинэ нөхцөл байдал үүссэн нь харамсалтай. Мөн Эрэл компанийн 129 тэрбумын зээл тодорхойгүй, эрсдэл өндөртэй байна. Барьцаа нь шаардлага хангахгүй. Зээлийн хөрөнгөөр бий болсон төсөл нь зогссон. Түүнчлэн "Газ импорт"компанийн 8 тэрбумын зээлийн барьцаа хөрөнгө нь тодорхойгүй байна. Тиймээс бид чанаргүй зээлүүдийг төлүүлэх талд ажиллаж байна" гэлээ.