Иргэдийн зүгээс зөвшөөрлийн асуудлаар “Хариугаа авч чадахгүй байна, зөвшөөрөл хаанаас авах вэ, хариу өгөх хугацаа тодорхойгүй, олон шатны баримт бүрдүүлгээс болж цаг хугацаа алдаж байна” гэх гомдол ихээр ирдэг.

Энэ байдлыг Зөвшөөрлийн тухай хуулиар халж, бүх үйл ажиллагааг цахимаар нээлттэй явуулахаар болжээ. Өөрөөр хэлбэл, өргөдөл гаргасан хүн өөрөө цахимаар зөвшөөрлийнхөө процессыг хянана гэсэн үг.

Түүнчлэн уг хуулийн 7.2 дугаар зүйлд хуулиар олгогдох 374 жагсаалтыг хавсаргаж, зөвшөөрөл хаанаас авах эсэхийг тодорхой заажээ.

Ингэснээр иргэдийг төөрөгдүүлсэн ойлгомжгүй байдлыг арилгасан юм. Тусгай зөвшөөрлийг 30 хоног, энгийн зөвшөөрлийг 21 хоногийн дотор шийдвэрлэдэг байхаар хуульд тусгасан. Хэрэв заасан хугацаанд зөвшөөрөл олгогч хариу өгөөгүй бол тухайн албан тушаалтанд хуулийн хариуцлага оногдуулах аж. Хууль хэрэгжсэнээр бизнес эрхлэх хүсэлтэй иргэд цаг хугацааг хэмнэж, хүнд суртал багасаж үүнийг дагаад авлига буурах зэрэг давуу талтай.

"1600 гаруй байсан зөвшөөрлийг 374 болголоо"

Монгол Улсын Их Хурлын гишүүн Ц.Цэрэнпунцаг

Иргэдэд хууль ойлгомжтой байх ёстой. Гэтэл иргэд хуулиа ойлгохгүй байна. Болсон жишээг хэлье. Завхан аймгийн Тосонцэнгэл сумын Баян-Улаан багийн иргэн Р түлээнд бэлтгэсэн модон дундаа хорхойд идэгдсэн хуурай мод хэдийг огтолсон хэргээр Дээд шүүхэд асуудал нь явж байна. Мөн Их-Уул сумын иргэн Э галын мод бэлтгэхдээ хэмжээнээс хэтрүүлэн ачиж явсан хэргээр шүүхэд дуудагдсан. Энэ асуудлууд уг хуулиар шийдэгдэнэ гэж харж байна. Хууль иргэдэд ойлгомжтой байх ёстой гэсэн зарчим хэрэгжихгүй байна. Нойтон модыг огтлох эрхийг тусгай зөвшөөрлөөр олгоно гэвэл ойлгомжтой болно. Хуулийн заалт иргэнд ойлгомжгүй байгаа учраас асуудал үүсэж байгаа юм.