Засгийн газрын 2020-2024 оны үйл ажиллагааны  хөтөлбөрт багтсан говийн бүсийг гадаргын усаар хангах “Хэрлэн-тооно” төслийг “Эрдэнэс Тавантолгой” ХК ус хангамжийн цогц төслүүдтэй уялдуулахаар ажиллаж байна.

Энэ хүрээнд “Эрдэнэс Тавантолгой” ХК “А6-20” дунд хугацааны бизнес төлөвлөгөөндөө “Загийн усны хоолой”-н гүний усны ордоос шугам хоолой татах төслийг хэрэгжүүлэхээр тусгасан. Одоогоор үндэсний 6 компани оролцсон түншлэл компаниудтай барилга угсралтын ажлыг гүйцэтгэхээр хамтран ажиллаж байгаа бөгөөд 2023 оны 3 дугаар улиралд дуусгахаар төлөвлөжээ.

Загийн усны хоолойн гүний усны орд нь Тавантолгой уурхайгаас 65 км орчим зүүн хойшоо Өмнөговь аймгийн Цогтцэций сумын нутагт байрладаг. Дэлхийн банкны хөрөнгө оруулалтаар 2015-2016 онд гидрогеологийн нарийвчилсан хайгуул судалгааг хийж Загийн усны хоолойн хэсэгт газар доорх усны нөөцийг 63,65 л/с- ээр тогтоосон байдаг.

Тавантолгойн нүүрсний уурхайд хүргэх ус хангамжийн системийг гүний худгууд- ус цуглуулах шугам- өргөлтийн насос станцууд- гол шугам хоолой- усан сан гэсэн дараалалтай барилга байгууламжаас бүрдэхээр төлөвлөсөн байна.

Энэхүү төсөл нь Тавантолгойд шаардлагатай усны асуудал бүрэн шийдвэрлэгдэх хүртэл 10 сая.тн хүчин чадалтай Нүүрс баяжуулах үйлдвэрийн усны хэрэгцээг хангах төдийгүй гадаргын усны төслийг хэрэгжүүлэхэд дэмжлэг үзүүлэх юм.