Монгол Улсын Засгийн газрын гишүүн, Зам тээврийн хөгжлийн сайд Л.Халтар долдугаар сарын 28-ны өдөр Баян-Өлгий аймагт ажиллалаа.

Тэрээр Бураатын давааны авто замын нөхцөл байдал, шинээр ашиглалтад орсон Шар нуурын авто замын хяналтын цэг болон Өлгий нисэх буудал, Азийн хөгжлийн банкны хөнгөлөлттэй зээлээр тавьж буй Өлгий хотыг тойрон өнгөрөх авто зам болон Ховд голын шинэ гүүрний бүтээн байгуулалтын ажлын явцтай газар дээр нь танилцав.

Өлгий хотыг тойрон өнгөрөх 18.8 км авто замын ажлын гүйцэтгэгчээр “Эйч Кэ Би Интернейшнл Холдинг” болон “Хотгор зам” компаниуд ажиллаж байна. Тус төсөл нь гурван багцаас бүрдэх ба нэгдүгээр багц нь 6.75 км авто зам, хоёрдугаар багц нь 201.08 метр урттай төмөр бетон гүүр, гуравдугаар багц буюу 11.8 км авто замын ажил юм.

Үүнээс “Хотгор зам” компанийн гүйцэтгэж байгаа 6.75 км авто замын хучилтын ажил 90 гаруй хувийн гүйцэтгэлтэй. “Эйч Кэ Би Интернейшнл Холдинг” компанийн тавьж байгаа 11.8 км авто замын ажлаас 3 км нь үлдсэн байна. Харин төмөр бетон гүүрний цутгалтын ажлыг хийсэн, нийт 48 дамнуурын 39-ийг нь бэлэн болгосон, ажлын явц 50 гаруй хувьтай байгаа аж.

Зам, тээврийн хөгжлийн сайд Л.Халтар дээрх ажлуудыг 10 дугаар сарын 30-ны өдрийг хүртэл дуусгахыг гүйцэтгэгч компанийн удирдлагуудад үүрэг болгов.

Тус авто зам нь Ховд, Баян-Өлгий аймгаар дайран БНХАУ-ын Шинжаань бүс нутаг, ОХУ-ын Сибирийн бүстэй холбох Азийн авто замын АН-4, CAREC-ийн корридор 4“а” чиглэлийн нэг хэсэг гэдгээрээ чухал ач холбогдолтой юм.

Л.Халтар: Зам, гүүрийн ажлыг 10-дугаар сард багтаан дуусгах үүрэг өглөө