2022 оны 07 дугаар сард Увс аймгийн Баруунтуруун сумын харъяат "Хилчин" спорт хорооны бөх Монгол Улсын Аварга Сүхбаатарын Мөнхбат Хяргас нуурын байгалийн цогцолбор газрын "Хар тэрмэс" хэсэгт Япон Улсын технологиор бүтээгдсэн хог шатаах "ЭКО ЗУУХ" -ыг байгаль хамгаалах үйлсэд хандив болгон өгч 2022 оны 07 дугаар сарын 23-ны өдөр өөрийн биеэр ирж ажиллагаанд оруулсан тухай мэдээлэл олон нийтэд хүрсэн билээ.

Зуухны хүчин чадлыг шалгаж Хяргас нуурын байгалийн цогцолбор газарт үйл ажиллагаа явуулж байгаа 4 жуулчны баазын 2,5 тонн орчим хогийг шатаахад нийт 5 кг орчим нунтаг үнс үлдэж байгааг Хамгаалалтын захиргаанаас тогтоожээ. Зуух сайн халсан үедээ шилийг хайлуулах хэмжээний чадалтай байгаа аж. 

Мөн малын гаралтай түүхий эд болох (арьс, толгой, шийр) бүрэн шатжээ. Ингэснээр ил задгай хог хаягдал үүсгэхгүй, бүрэн шатаах боломжтой сайн зуух гэдэг нь нотлогдсон байна.