Сүхбаатар дүүргийн Засаг дарга Х.Болормаа албаны хүмүүсийн хамт Зэвсэгт хүчний 326 дугаар ангид алба хааж буй залуусаа эргэв.

Сүхбаатар дүүргийн Засаг даргын Тамгын газраас цэргийн алба хааж буй дайчдынхаа албаны нөхцөл байдалтай танилцах, санал хүсэлтийг нь сонсох зорилгоор  энэхүү  уулзалт, өдөрлөгийг зохион байгуулж байгаа юм.

Хурандаа Г.Отгонбаяр захирагчтай Зэвсэгт хүчний 326 дугаар ангийн Зенитийн артиллерийн дивизионы хугацаат цэргийн алба хаагчдын 50 гаруй хувийг Сүхбаатар дүүргээс татагдсан цэргүүд эзэлж байгаа юм.

2021 оны хоёрдугаар ээлж, 2022 оны нэгдүгээр ээлжээр хугацаат цэргийн албанд татагдсан залуус  албаа нэр төртэй хааж байна.

Тус ангиас алба хаагчдынхаа өөрийгөө нээн хөгжүүлэх, бие биенээсээ суралцах орчин нөхцөлийг бүрдүүлэх зорилгоор төрөл бүрийн дугуйлан хичээллүүлж байна. Ангийн захирагчийн тушаалаар үлээвэр найрал хөгжмийн салааг байгуулан бие даасан анхны тоглолтоо нийт бие бүрэлдэхүүнд болон ар гэрийнхэндээ зориулан тогложээ. 90 гаруй албан хаагч В,С ангиллын жолооны сургалтад суусны 46 нь Сүхбаатар дүүргийн залуус байна. Тэд жолооч мэргэжилтэй халагдах аж.

Мөн алба хаагчдын сургалт, өдөр тутмын мэдээг ар гэрт нь өгдөг, санал, хүсэлтийг хүлээн авдаг фейбүүкийн хаалттай группыг хөтөлж байгаа нь олны талархлыг хүлээсэн ажил болжээ.

Энэ удаа гэрээт цэргийн албанд үлдэхээр 27 залуу саналаа өгснөөс 16 нь мөн Сүхбаатар дүүргийнх байна гэх мэтчилэн талархалтай олон ажлыг зохион байгуулж байна.

Цаашид Сүхбаатар дүүргийн Засаг дарга, Засаг даргын Тамгын газраас батлан хамгаалах хууль, тогтоомжоор хүлээсэн үүргийнхээ хүрээнд тус ангитай олон чиглэлд хамтран ажиллах,  харилцан дэмжлэг үзүүлэх тал дээр санал нэгдлээ.