Сүхбаатар дүүргийн Засаг даргын Тамгын газраас 2021 оны хоёрдугаар ээлж, 2022 оны нэгдүгээр ээлжээр хугацаат цэргийн албанд татагдсан залуусаа эргэх үйл ажиллагааг хуваарийн дагуу зохион байгуулж байна.

Энэ удаа Сүхбаатар дүүргийн Засаг даргын Тамгын газрын дарга Н.Энхболд Цэргийн штабын ажил хариуцсан мэргэжилтнүүдийн хамт Завхан аймгийн Тэс сумын нутагт байрлах, хурандаа Б.Уламжаргал захирагчтай Хилийн цэргийн 277, Увс аймгийн Баруунтуруун сумын нутаг дахь хурандаа Д.Ганхуяг захирагчтай Хилийн цэргийн 0311 дүгээр ангиудад Сүхбаатар дүүргээс татагдан хугацаат цэргийн албаа хааж буй залуусаа эргэн, албаны нөхцөл байдалтай танилцаж, тэдний санал, сэтгэгдлийг сонсов.

Энэ үеэр эх орны баруун хязгаар нутагт эр цэргийн албаа хааж байгаа залууст ар, гэрээс нь илгээсэн чин сэтгэлийн үгтэй захидал, дүүргийн Засаг даргын гарын бэлэг, дурсгалыг зүйлсийг гардуулан өглөө.

Цэргийн залуус албаа нэр төртэй хаахын зэрэгцээ авьяас билгээ нээн хөгжүүлж байна. Тэд урлагийн тоглолт сонирхуулан нутгийн захиргааны байгууллагаас эргэлт ирсэнд баяртай байгаагаа илэрхийлж байлаа.