Монголчууд Үндсэн хуулиараа олгогдсон шашин шүтэх, эс шүтэх эрхтэй ард түмэн. Тэрдундаа Христ итгэл манай улсад 1990 оноос гарч ирсэн шинэ итгэл бишрэл бус харин Монголчуудын дунд эртнээс байсан итгэл бишрэл бөгөөд 1000 гаруй жилийн түүхтэй гэдгийг түүхэн эх сурвалжууд баталдаг.

Өнөөдөр манай улсын хүн амын багагүй хувийг эзэлдэг христэд итгэгчид Есүс Христийн сайн мэдээг бусдад түгээхээс гадна, нийгмийн олон талбарт үйлчилж, олон хүмүүст итгэл найдварын үгийг дамжуулсаар байна.

Амьдрал өөрчлөх итгэл найдварын мэдээ ба амьд хөгжмийн тоглолт

Энэ хүрээнд Улаанбаатар хотын 200 гаруй сүм, цуглаан доктор Франклин Грейам болон Билли Грейамын Сайнмэдээний Холбоо (БГСМХ)-той хамтран, нэртэй хамтлаг дуучдыг оролцуулсан хоёр өдрийн Баяр хөөрийн наадмын арга хэмжээг зохион байгуулж, Бурханы агуу хайрын тухай түүхийг тунхаглах юм.

Тэд 9-р сарын 10-ны Бямба гараг, 9-р сарын 11-ний Ням гарагт 18:00 цагт Степпе-Арена Мөсөн өргөөнд болох үнэ төлбөргүй, гэр бүлд ээлтэй энэхүү арга хэмжээнд хүн бүрийг хүрэлцэн ирэхийг урьж байна.

Энэ бол түүхэн үйл явдал - Монголын Христийн чуулганууд Есүс Христийн сайнмэдээг тунхаглахаар ийнхүү хамтдаа нэг дор цугларч байна. Энэхүү сайнмэдээг тунхаглах арга хэмжээг Монголын чуулганууд, БГСМХ-той хамтарч зохион байгуулахаар одоогоос 20 орчим жилийн өмнөөс залбирч, бэлдэж эхэлсэн түүхтэй.

Л.Баясгалан: "Ивээлийн хур" чуулганы пастор, Баяр хөөрийн наадмын тэргүүн

 “Дэлхийн маш олон улс орны хүмүүс энэхүү наадмын арга хэмжээнд оролцож, Бурханы Хүү Есүс Христэд итгэж, аврагдаж, ерөөгдөж байна. Монголын ард түмэн бид энэ гайхалтай үйл явдлын нэг хэсэг байх учиртай. Тиймээс бид энэхүү наадмын арга хэмжээг зохион байгуулж, ард түмэндээ Бурханы агуу хайрын түүхийг өгүүлж, ерөөл хүсэж байна. Дэлхийн олон улс орноор аялан явж сайнмэдээ тунхагладаг, доктор Франклин Грейам удахгүй Улаанбаатар хотод ирэх бөгөөд түүнтэй хамтран зохион байгуулах Баяр хөөрийн наадмаар дамжуулан Бурхан олон хүний амьдралд гэрэл гэгээ авч ирнэ гэдэг итгэж байна” 

Доктор Грейам дөрвөн жилийн өмнө буюу 2018 онд Монгол улсад айлчилж байсан. Тэрээр ирэх үедээ өөрийн тэргүүлдэг “Самаарын хэтэвч” олон улсын Христитгэлт тусламжийн болон сайнмэдээний байгууллагын “Хүүхдийн зүрх” төслийн ашиг тусыг хүртэж, АНУ-д зүрхний мэс засал хийлгэсэн 450 орчим монгол хүүхдийн төлөөлөл болон арав гаруй монгол пастортай биечлэн уулзсан байна.

Франклин Грейам Доктор

 “Би Монголын олон арван эрдэнэт үрсийг хайрлаж, тэдний амь насыг аврахзүрхний мэс засалд оруулж чадсандаа сэтгэл дүүрэн явдаг. Хүний бие эрүүл байх нь маш чухал, би үүний төлөө чадах бүхнээ хийхийг хүсдэг, харин хүний зүрх сэтгэлийн хамгийн чухал хэсэг бол сүнслэг байдал гэж би итгэдэг. Бурхан биднээр дамжуулж Библид өгүүлдэг итгэл найдварын тухай Монгол улсад хуваалцах боломж олгож байгаа гэдэгт бид итгэж байна. Би энэ агуу үндэстний ард түмэнд, Бурхан тэдэнд санаа тавьдаг болохыг, мөн Бурханд тэдний амьдралд зориулсан агуу төлөвлөгөө бий гэдгийг тунхаглаж, урамшуулахыг хүсэж байна."

"Улаанбаатар баяр хөөрийн наадам" нь Монголын ахуй соёлд хүндэтгэлтэй хандаж, олон зууны тэртээгээс тус улсад байсан христитгэлийн баялаг өв соёлд тулгуурлан үйл ажиллагаагаа явуулах болно. Энэхүү арга хэмжээнд Монголын христитгэлт дуучин, хөгжмийн зохиолч, продюсер Наки амьд хөгжмийн хамтлагтайгаа хамт оролцоно. Мөн Монголын Христэд итгэгчдээс бүрдсэн язгуур урлагийн “Nomadic Spirit” хамтлаг ая эгшигээ өргөнө. Түүнчлэн АНУ-ын Госпел хөгжмийн холбооноос хэд хэдэн удаа шагнал хүртсэн, шилдэг хриситгэлт “The Afters” хамтлаг оролцох болно.

Доктор Билли Грейам анх 1950 онд Билли Грейамын Сайнмэдээний Холбоог үүсгэн байгуулсан бөгөөд тус холбоо нь дэлхий даяар Есүс Христийн сайнмэдээг тунхагладаг. Франклин Грейам эцгийнхээ насан туршдаа хийсэн ажлыг нь үргэлжлүүлж байгаа бөгөөд сайнмэдээг тунхаглахад бүх амьдралаа зориулж яваа эрхэм юм. Тэрээр 1989 онд анхныхаа сайнмэдээ тунхаглах томоохон арга хэмжээг зохион байгуулснаас хойш өдгөө хүртэл дэлхийн өнцөг булан бүрт олон наадам зохион байгуулж, Бурханы хайрын мэдээг тунхагласаар байна.

Шинэ он эхэлснээс хойш доктор Грейам Их Британы Вант Улсын дөрвөн томоохон хотод, мөн Бразилийн Рио-де-Жанейро хотод сайнмэдээг тунхаглажээ. Энэ оны сүүлээр доктор Грейам Италийн Милан хот, Шинэ Зеландын гурван өөр хот, мөн АНУ-ын зургаан хотод сайнмэдээ тунхаглахаар төлөвлөн ажиллаж байна.

Сэтгүүлч

Сэтгүүлч Ц.Соёлмаа soyolmaa@vip76.mn