Гэмт хэрэг, зөрчилтэй тэмцэх, урьдчилан сэргийлэх тогтолцоо, бодлого, арга барилыг боловсронгуй болгохоор Эрүүгийн хуульд нэмэлт өөрчлөлт оруулахаар УИХ-аар хэлэлцэж байна.

Цар тахлын үед үнийн хөөрөгдөл, бараа бүтээгдэхүүний хомсдол үүссэн талаар худал мэдээлэл үлэмж ихэссэн. Үүнээс шалтгаалж, нийгэмд замбараагүй байдал үүсэж, иргэдэд хүндрэл учруулдаг байв.

Хуулийн нэмэлт өөрчлөлтөөр эл асуудлыг шийдэж, илтэд худал мэдээлэл тараасан бол 450-1300 нэгж буюу 450 мянгаас 1 сая 300 мянга хүртэлх төгрөгөөр торгох, 240-480 цаг нийтэд тустай ажил хийлгэх, 1-6 сар хүртэл зорчих эрхийг хязгаарлах аж. Мөн халдашгүй бүрэн эрхээр “халхавчлан” хөөн хэлэлцэх хугацаа дууссан үндэслэлээр эрүүгийн хариуцлага хүлээдэггүй асуудлыг эл хуулиар таслан зогсоож байна.

Эрүүгийн хуулийн нэмэлт өөрчлөлтөөр иргэнтэй холбоотой хэд хэдэн заалтыг шинээр оруулсан. Үүний нэг нь доромжлох заалт. Тодруулбал, хуулийн 13.15 дугаар зүйлд хүний нэр төр, алдар хүндийг олон нийтэд гутаан доромжилсон бол 450-1300 нэгж буюу 450 мянгаас 1 сая 300 мянга хүртэлх төгрөгөөр торгох, 240-720 цаг хүртэл хугацаанд нийтийн устай ажил хийлгэх, мөн 1-6 сар хүртэл зорчих эрхийг хязгаарлах болжээ.

Хэдийгээр уг хуулийн төслийг Олон улсын гэрээ конвенц, зөвлөмжид нийцүүлэх шаардлагатай гэж хууль санаачлагчид үзсэн ч энэ мэтчилэн иргэнээ торгосон, гэмт хэргийн шинж чанартай зүйл ангиар ял оноох асуудалд болгоомжтой хандах нь ёстой гэдгийг Улсын Их Хурлын гишүүд хэлж байлаа.

Монгол Улсын Их Хурлын гишүүн Н.Наранбаатар

Энэ хуулийн төсөлд нэг аюултай заалт орж ирсэн байна. Хэдэн малчдаа бариад шоронд хийчихээр заалт байгаа юм. Тодруулбал, хуулийн 20.18 дээр тусгай зөвшөөрөл эзэмшигчийн үйл ажиллагаанд саад хийсэн бол торгохоос эхлээд 3 жил хүртэлх хугацаанд хорино гэнэ. Тусгай зөвшөөрөл эзэмшигчид нь уул уурхайн компани, хайгуулын болон ашиглалтын тусгай зөвшөөрөл орно. Манай улсад тусгай зөвшөөрлийг хууль бусаар олгодог олон тохиолдол бий. Нутгийн иргэд нь санал гомдол гаргаад, шүүх дээр очоод хүчингүй болсон асуудал их. Үүнийг анхаарах хэрэгтэй.

Эрүүгийн хуульд "доромжлох" заалт шинээр оруулжээ