МҮЭ-ийн холбооны XXIII Их хурлаас гарсан шийдвэр МҮЭ-ийн холбооны "Хөгжлийн хөтөлбөр-2030" хэрэгжилтийг хангуулах хүрээнд ерөнхийлөгчөөр ахлуулсан ажлын хэсгийн гишүүд Баянхонгор, Говь-Алтай аймагт ажиллаж байгаа билээ.

Энэ хүрээнд өнөөдөр (2022.09.30)-нд МҮЭ-ийн холбооны Ерөнхийлөгч С.Эрдэнэбатаар ахлуулсан ажлын хэсгийн гишүүд Говь-Алтай Аймгийн "Цогт" сумын төрийн албан хаагчидтай уулзаж тулгамдаж буй асуудлыг нь сонслоо.

Энэ үеэр сумын Засаг Даргын Тамгын Газар, эрүүл мэндийн төв, сургууль, цэцэрлэгийн ҮЭ-ийн гишүүд, иргэд хөдөлмөрчидийн зүгээс төрийн үйлчилгээ, захиргааны албан хаагчид дунджаар 400-700 мянган төгрөгийн цалин авдаг, Улаанбаатар хотоос 1000 км зайд орших алслагдсан сумын иргэдийн цалин хэт бага боловч өргөн хэрэглээний бараа бүтээгдэхүүний үнэ хоёр дахин өндөр, тог тасрах, сүлжээ унах нөхцөлөөс шалтгаалж эрүүл мэндийн ажилтнууд гүйцэтгэлд суурилсан цалин хөлсний тогтолцоогоор цалинжих боломж хаагддаг, сумын төрийн алба хүний нөөцийн дутагдлын улмаас нэг мэргэжилтэн гурван хүний ажлыг нугалж хийдэг ч үндсэн цалингаа бүрэн авч чаддаггүй зэрэг зөрчил дутагдлын талаар хэлж байсан юм.