"Чингис хаан" музей өнөөдөр буюу намрын дунд сарын шинийн 17-ны билэгт сайн өдөр албан  ёсоор нээгдлээ.

Монголын түүхэнд тодоор бичигдэх энэ музейн бүтээн байгуулалтад гар бие оролцож, сэтгэл зүтгэлтэй ажилласан урлаачид, түүхчид, судлаачид, сэргээн засварлагчид, сан хөмрөгч, бүтээгчдэдээ Нийслэлчүүдийнхээ нэрийн өмнөөс чин сэтгэлийн баяр хүргэе.

"Чингис хаан" музей анхны төрт улс байгуулсан Хүннүгээс эхлэн Монголын их эзэнт гүрний Их Монгол улс, Юань улс, Чингис хааны угсаатны хаад язгууртнуудын түүхийг харуулснаараа онцлогтой.

"Чингис хаан" музей нүүдэлчдийн түүхийг цогцоор нь харуулсан 11 мянга гаруй үзмэртэй, төрт ёсны Ази тивдээ томоохонд тооцогдох музей болон үүд хаалгаа нээж байна.