УИХ-ын Байгаль орчин, хүнс, хөдөө аж ахуйн байнгын хорооны /2022.10.25/ өдрийн хуралдаанаар Байгаль орчин, хүнс, хөдөө аж ахуйн байнгын хорооны 2022 оны 01 дүгээр сарын 17-ны өдрийн “Засгийн газарт чиглэл өгөх тухай” 01 дүгээр тогтоолын хэрэгжилтийн талаарх Хүнс, хөдөө аж ахуй, хөнгөн үйлдвэрийн сайдын мэдээллийг сонслоо.

УИХ-ын гишүүн Б.Бейсен:

Эрүүл мэндээ хамгаалж эдийн засгаа сэргээх 10 их наядын цогц төлөвлөгөөний хүрээнд арилжааны 7 банкаар дамжуулан газар тариалан, үйлдвэр эрхлэгчдэд 72 тэрбум, төмс хүнсний ногоо тариаланч, аж ахуйн нэгжид 28 нийт 100 тэрбум төгрөгний зээлийг жилийн 3%-ийн хүүтэй, хоёр жилийн хугацаанд өгсөн. Уг зээлийн хэрэгжилт ямар байна вэ? Эзэндээ хүрсэн үү?

Мөн Азийн хөгжлийн банкны 40 сая долларын зээл, Япон улсын ядуурлыг бууруулах сангийн 2 сая долларын буцалтгүй тусламжийн хэрэгжилт ямар байна вэ? Хүнсний ногооны үйлдвэрлэл, усалгаатай аж ахуй нэгж гээд Баян-Өлгий Ховд, Говь-Алтай, Завхан, Сэлэнгэ, Төв, Хэнтий аймгуудын нийт 2731 га талбайд 9 услалтын системийг шинээр сэргээн засах ажлыг эхлүүлээд 2023 онд ашиглалтад өгнө гэсэн. Энэ ажлын хэрэгжилт хэр байна вэ?

Энэ жил төмс 206 мянган тонн, 120 мянган тонн хүнсний ногоо хурааж авна гэсэн. Энэ нь дотоодын хэрэгцээний хэдэн хувийг хангах уу? Импортоор хэдэн хувийг авах вэ?