Орчин үеийн оффисын чиг хандлага хөгжлөө даган хувьсан өөрчлөгдөж байна. Уламжлалт хэв маягаас илүүтэй орчин үед нийцсэн шинэлэг шийдэлтэй оффистой байхыг байгууллагууд эрмэлзэх болж. Тиймээс энэ сэдвээр 14 жилийн арвин туршлагатай “Novus Solution” ХХК-ийн гүйцэтгэх захирал, интерьер дизайнер, архитектор Д.Батсайхантай ярилцлаа.

 -Сайн байна уу. Бидний урилгыг хүлээн авсанд баярлалаа. Орчин үед оффисыг ажилчдынхаа тав тухыг хангахуйц ажлын бүтээмжийг нэмэгдүүлсэн, сэтгэл ханамжтай байдлаар бүрдүүлж, байгууллагынсоёлыг илэрхийлэх цогц шийдэлтэй болж байна. Байгууллагууд үүнийг бүрдүүлсэн оффисын төлөвлөлт гаргахдаа юун дээр хэрхэн анхаарах вэ?

“Ковид-19” цар тахлаас үүдэн дэлхий нийтээрээ зайнаас ажиллах байдалд шилжсэн. Харин манай улсын хувьд оффисын ажлыг зайнаас хийхэд тохиромжгүй, бүтээмж муутай байсан. Ажлын орчныг хоёр дахь гэр гэж нэрлэдэг. Тиймээс байгууллагууд ажилтныхаа тав тухтай байдлыг хангаж, гэртээ байгаа юм шиг орчин бүрдүүлэхийг эрмэлзэж байна. Ингэхдээ хэд хэдэн зүйлийг анхаарах нь чухал. Энэ бүгдийг багтааснаар орчин үеийн шийдэлтэй оффистой болох юм.

Нэгдүгээрт, орон зайн хэмжээнд багтааж шийдлээ тооцоолох хэрэгтэй. Янз бүрийн объекттой албан байгууллага бий. Иймд тухайн орчин нөхцөлд тааруулж интерьерийн шийдэл гаргадаг. Зай талбайг нарийн тооцоолон олон төрлөөр ашиглаж болох орчин бүрдүүлэхэд архитектороос ур, чадвар шаарддаг. Тухайн байгууллага ямар ч объектод байрласан аюулгүй байдлаа хангаж, барилгын норм, стандартаа мөрдөн, мэргэжлийн хүнээс зөвлөгөө авч шилдэг интерьерийн зураг төслөө гаргах шаардлагатай. Сүүлийн үед байгууллагууд ажилчдынхаа эрүүл мэнд, цаг хугацаанд анхаарч, өөрсдөө өдрийн хоолоо хийж идэх нөхцөл, боломжоор хангаж “гал тогооны өрөө”-тэй байх шинэ соёлыг түгээн дэлгэрүүлэх болсон.

Цаашлаад ажилчдын амралтын өрөө, ариун цэврийн өрөө, хувцасны өрөөтэй байлгахыг эрмэлзэж байна. Хувцасны өрөө нь зөвхөн гадуур хувцасаа өлгөх биш, хүн бүрийн хувцасны locker-той, гутлаа тайлаад хийх зориулалттайгаар бүтээх юм. Оффисын ажилтан өглөө ажилдаа ирээд гадуур хувцсаа тайлдаг ч гутлаа тайлахгүй 8 цагийн турш ажилладаг. Гадны улсад энэ нь соёл болтлоо хөгжсөн ч манай улсын хувьд үүнийг төдийлөн анхаардаггүй. Тиймээс ажилтныхаа тав тухыг хангах үүднээс хувцасны өрөө байгуулах нь чухал.

Мөн интерьер, дизайныг зөвхөн гоо сайхан талаас нь харж болохгүй. Ихэнх байгууллага оффисын орчныг гоё, сайхан талаас нь хардаг. Харагдах байдлаас обой, чимэглэл, тавилгын өнгө үзэмжинд анхаарснаас чухал асуудлыг орхигдуулдаг. Интерьер, заслыг хийхдээ хамгийн түрүүнд оффисын төлөвлөлтийг хийх ёстой. Тухайн байгууллага ямар үйл ажиллагаа явуулдаг, нийт хэдэн ажилтан, албан хаагчтай, ямар техник, тоног төхөөрөмж ашигладаг, орон зайн багтаамж, ажилтан тус бүрийн үүрэг, ажлын онцлогийг нарийн гаргах нь чухал.

Үүнээс шалтгаалж байгууллагад тохирсон интерьер, дизайныг хийдэг. Түүнчлэн дэд бүтцэд анхаарах ёстой. Оффис нь олон нийтийн барилга учир Монгол Улсад мөрдөгдөж буй барилгын норм дүрмийн дагуу  агааржуулалтын систем, сан,  гэрэлтүүлэг, цахилгааны холболт шугам, цахилгааны ачаалал, холбоо дохиолол, галын гарц, ус шүрших систем, утаа мэдрэгч зэрэг нь оффист зайлшгүй байхаас гадна, шаардлага хангасан байх хэрэгтэй. Гэрэлтүүлэг муутай орчинд  ажилтан амархан ядрах, бүтээмж нь муудах сөрөг үр дагавартай. Тиймээс дэд бүтцээ интерьер, дизайнтайгаа хослуулах нь хамгийн чухал.

Инженерийн асуудлыг орхигдуулж болохгүй

Дээрээс нь инженерийн асуудлыг орхигдуулдаг. Орчин үед интерьер дизайнерууд барилгын бүхий л инженерүүдтэй хамтарч ажиллах шаардлагатай. Дээр хэлсэнчлэн оффис бол олон нийтийн барилга. Инженерүүдийн зураг төсөл нь, интерьерийнхээ зураг төсөлтэй ан, цав гарахгүй таарч байх ёстой. Мөн дизайнерын уран сэтгэмжийн дагуу зарим инженерчлэл бүхий холболтуудыг норм журмын дагуу гүйцэтгэх инженер заавал байх нь зөв. Эцэст нь сайн судалгаан дээр суурилсан орчин үеийн чиг хандлагыг агуулсан, давтагдашгүй оффисын интерьер дизайныг гаргуулах нь захиалагчийн гол хүсэл. Үүнийг гүйцэтгэхийн тулд дизайнерууд тухайн орчныг сайтар судлан сул талыг арилган давуу талуудыг бий болгох үүрэгтэй байдаг. Түүнчлэн шинэ оффисоо эдэлгээ даахуйц удаан хугацаанд шинээр нь ашиглахын тулд сайн чанарын материал ашиглан, ур чадвартай хүмүүсээр гүйцэтгүүлэх нь чухал.

- Орчин үеийн оффисын интерьерийн хөгжлийн чиг хандлага ямар байна вэ?

Сүүлийн үед интерьер дизайны чиг хандлага контемпорари, минималист гэсэн хоёр урсгал руу хөгжиж байна. Минималист гэдэг нь жижиг орон зайд хамгийн хэрэгтэй зүйлсээ багтаагаад, илүү дутуу зүйл, гоёл чимэглэл, сувинер багатай байхыг хэлдэг. Контемпорари нь шинээр гарч ирж буй загвар буюу дизайнерууд ямар шийдэл гаргаж байна түүнийг интерьерт ашиглаж байгааг хэлж байгаа юм. Энэ нь мэдээж илүү үнэтэй, чамин харагдах зүйлсийг тохижилтонд ашигладаг.

-Та энэ салбарт 14 жил ажиллаж буй туршлагатай хүн. Компанийнхаа түүхээс уншигчдадаа хуваалцвал?

"Novus solution” ХХК нь 1998 онд байгуулагдсан “Таван орд” толгой компаны салбар компани. Бид үүсэн байгуулагдсан цагаасаа мэргэшсэн дизайны баг, туршлагатай инженер техникийн ажилчид, үйлдвэрлэлийн дэвшилтэт технологи, олон жилийн  дадлага туршлага дээр суурилан хэрэглэгчдэд барилга угсралт,  засвар үйлчилгээ, интерьер, экстерьер дизайны зураг төсөл, тавилга үйлдвэрлэл, худалдаа бүхий  цогц бүтээгдэхүүн үйлчилгээ үзүүлэн салбартаа тэргүүлэгч компани болох зорилготой өргөжин хөгжсөөр байна. 2008 оноос эхлэн интерьер, дизайны чиглэлээр голчлон үйл ажиллагаа явуулснаар 14 жилийн түүхийг бүтээжээ.

Өнгөрсөн 2021 онд өргөжин тэлж тавилга үйлдвэрлэлийн салбарт “Новус солюшн”, барилгын карказ угсралтын “Өнөр бүтээл” охин компаниа байгуулсан. Интерьерийн зураг, төсөл зурах, инженерийн шугам, сүлжээ хийх, тавилга угсрах зэрэг өөрөөр хэлбэл шороо ухаж ажлаа эхлүүлэхээс түлхүүр хүлээлгэж өгөх хүртэлх бүх үйл ажиллагааг үзүүлдэг. Бид 25 жилийнхээ ойн хүрээнд ажилчиддаа зориулан өөрсдийн оффисоо барьсан. 1-6 давхар хүртэл зөвхөн ажилчдынхаа тав тухтай байдлыг хангах хүрээнд хийсэн гэдгээрээ онцлогтой. Манай оффист ирснээр сүүлийн үеийн интерьер, дизайны шийдэл, ямар үнэ цэнтэй материалыг яаж ашигласан, ямар дизайн, консевц ноёрхож байна, өрөөнүүд маань ямар үүрэгтэй байна гэдгийг харж болно.

-Танай компани цогц үйлчилгээ үзүүлдэг гэдгээрээ бусдаас ялгарч байна. Харин 14 жилийн хугацаанд ажиллахдаа голчлон юун дээр анхаарч ирсэн бэ?

Бидний эхлүүлсэн төсөл урт удаан хугацаанд шинээрээ байхад материалын сонголт дээр маш их анхаардаг. Хэзээ ч Хятад бүтээгдэхүүн ашигладаггүй. Материалын насжилт ямар байдаг вэ гэдгийг мэддэг учраас захиалагч талаас бидний шаардлагаас доош түвшний материал санал болгоход үүн дээр баталгаа өгдөггүй. Мөн манай компанийн хамгийн гол эрхэмлэдэг зүйл нь харилцагчийнхаа сэтгэл ханамжийг нэн тэргүүнд чухалчилж ашиг орлогыг хоёрдугаарт эрэмбэлдэг. Ашгаас илүү тухайн байгууллагад тохирсон зөвлөгөөг өгч, харилцан нэгдмэл байдлаар ажилладаг юм.

Нэг харилцагчаа алдаж байгаа бол нэг шүднээсээ салж байгаа хэрэг.

Тиймээс захилагчийнхаа санал, хүсэлтийг багтааж, эхлүүлсэн ажлаа нэр төртэй дуусгахыг зарчим болгодог. Хамтран ажилласан байгууллагууд маань ч байнгын эргэх холбоотой байдаг.

-Өдрөөс өдөрт өөрчлөгдөн шинэчлэгдэж буй энэ салбарын хөгжилтэй хөл нийлүүлэн алхахад “Novus Solution” ХХК ямар алсын хараатай ажиллахаар төлөвлөж байна вэ?

Манай компани судалгааны багтай. Бүх автомат системийг нэвтрүүлэх гэж байгаа. Үүнийг судлаад 1-2 жил боллоо. Интерьер дизайны оффисын чиг хандлага смарт буюу ухаалаг байх тал руу хөгжиж байна. Тухайлбал сүүлийн үеийн цаг бүртгэлийн систем дээр ажилтан орж ирээд бүртгүүлэхэд тухайн ажилтны сэтгэл хөдлөл, зан байдал, нойрмог байна уу, сэтгэл гутралтай байна уу зэрэг мэдээллийг харах боломжтой болж байгаа юм. Энэ мэдээллүүд хүний нөөцийн ажилтан руу очиход ямар арга хэмжээ авах нь харагдана гэсэн үг. Энэ мэтчилэн технологийн шийдлүүдийг илүү ашиглах нь элбэг байх болно.

Цаг гарган ярилцсан танд баярлалаа.

"Novus Solution" ХХК-ны хийсэн төслүүдээс үзүүлж байна.

https://www.facebook.com/novus.solution.2020